New Delhi તા. 26
ભારતનું આઈપીઓ માર્કેટ જુલાઈમાં ફરીથી સ્પીડ પકડવા માટે તૈયાર છે. છેલ્લાં કેટલાક મહિનાઓની સુસ્તી બાદ હવે ઘણી કંપનીઓ પોતાનાં આઈપીઓ લોન્ચ કરવાની તૈયારી કરી રહી છે.
આવતાં મહિને એક ડઝનથી વધુ કંપનીઓ માર્કેટમાંથી અંદાજે 45,000 કરોડ રૂપિયા એકઠાં કરવાની યોજના બનાવી રહી છે. ઇન્વેસ્ટમેન્ટ બેન્કર્સનું કહેવું છે કે અલગ-અલગ સેક્ટરની કંપનીઓ પોતાની લિસ્ટિંગની તૈયારીઓ ઝડપી કરી રહી છે, કારણ કે માર્કેટની સ્થિતિ હવે તેમના પક્ષમાં છે.
સેન્સેક્સ-નિફ્ટીમાં ઉતાર-ચઢાવ પછી હવે મજબૂતી જોવા મળી રહી છે. સૌથી મોટો આઈપીઓ એસબીઆઈ ફંડ્સ મેનેજમેન્ટનો હોઈ શકે છે, જે 12,000 થી 13,000 કરોડ રૂપિયાની વચ્ચે હશે. આ પછી મણિપાલ હેલ્થ એન્ટરપ્રાઇઝિસનો આશરે 11,000 કરોડ રૂપિયા અને ઝેપ્ટોનો 8,000 કરોડ રૂપિયાનો આઈપીઓ આવવાની આશા છે.
આ ત્રણેયને મળીને જ આશરે 32,000 કરોડ રૂપિયા એકઠાં થશે. જુલાઈના આઈપીઓ પાઇપલાઇનમાં મેગા કેપિટલ, નેક પેકેજિંગ, ઇનોવેટિવ વ્યુ જેવી કંપનીઓ પણ સામેલ છે.
શું છે કારણ?
જેએમ ફાઇનાન્શિયલના એમડી અને સીઈઓ સોનિયા દાસગુપ્તાએ જણાવ્યું કે, આગામી સમયમાં આઈપીઓ માર્કેટમાં લિસ્ટિંગની પ્રવૃત્તિઓ વધુ ઝડપી થવાની અપેક્ષા છે. આનું કારણ વિશ્વભરમાં ચાલી રહેલી અનિશ્ચિતતાઓનું ધીમે-ધીમે ઓછું થવું અને ભારતીય રોકાણકારોનો માર્કેટ પર ભરોસો ટકી રહેવો તે છે.
આ વર્ષે કેમ રહી સુસ્તી?
વર્ષ 2025 ના બીજા છ મહિનામાં (જુલાઈ-ડિસેમ્બર) જોરદાર તેજી જોવા મળી હતી, પરંતુ આ વર્ષે આઈપીઓની રફતાર થોડી ધીમી પડી ગઈ. આનું મુખ્ય કારણ ખાડી યુદ્ધ જેવાં વૈશ્વિક તણાવ અને વિદેશી સંસ્થાકીય રોકાણકારો તરફથી ઓછું રોકાણ રહ્યું છે.
આ વર્ષે એપ્રિલ સુધી 18 આઈપીઓ આવ્યાં હતાં, પરંતુ મે મહિનામાં એક પણ કંપની માર્કેટમાં નહોતી આવી. નિષ્ણાતોનું માનવું છે કે પશ્ચિમ એશિયામાં તણાવ ઓછો થવાથી વૈશ્વિક અનિશ્ચિતતા ઘટી છે. આનાથી રોકાણકારોનો ભરોસો વધશે.
શું છે દ્રષ્ટિકોણ?
સોનિયા દાસગુપ્તાનું કહેવું છે કે રોકાણકારો માત્ર એ જ કંપનીઓને પસંદ કરી રહ્યાં છે જેમનો પાયો મજબૂત છે અને જ્યાં ગ્રોથની આશા છે. જેમનાં બિઝનેસ મોડલ લાંબા સમય સુધી ટકી રહે તેવા છે. રિટેલ રોકાણકારોની ભાગીદારી પણ માર્કેટમાં નોંધપાત્ર રીતે વધી રહી છે.
શું છે તૈયારી?
19 જૂન સુધી અંદાજે 173 કંપનીઓને સેબી તરફથી 2.7 લાખ કરોડ રૂપિયા એકઠાં કરવાની મંજૂરી મળી ચૂકી છે. ત્યાં જ, 64 અન્ય કંપનીઓ સેબીની લીલી ઝંડીની રાહ જોઈ રહી છે. આમાં એનએસસીનો 30,000 કરોડ રૂપિયા અને જિયો પ્લેટફોર્મ્સનો મોટો આઈપીઓ પણ સામેલ છે.
