(નયના દવે દ્વારા)
Jamnagar તા.૧૫
Jamnagar જિલ્લામાં નાસતા-ફરતા આરોપીઓ સામે હાથ ધરાયેલી વિશેષ ઝુંબેશ અંતર્ગત જામનગર એસ.ઓ.જી.ને વધુ એક સફળતા મળી છે. નેગોશિએબલ ઇન્સ્ટ્રુમેન્ટ એક્ટની કલમ-૧૩૮ હેઠળના ગુનામાં કોર્ટ દ્વારા સજા પામેલો અને છેલ્લા ૬ માસથી નાસતો ફરતો આરોપી એસ.ઓ.જી.ના હાથે ઝડપાઈ ગયો છે.
જામનગર જિલ્લામાં નાસતા ફરતા આરોપીઓને પકડવાની કાર્યવાહી હાથ ધરવામાં આવી રહી છે. આ અંતર્ગત એસ.ઓ.જી.ના ઇન્ચાર્જ પોલીસ ઇન્સ્પેક્ટર વી.બી. ચૌધરી, પોલીસ સબ ઇન્સ્પેક્ટર એલ.એમ. ઝેર અને પોલીસ સબ ઇન્સ્પેક્ટર એ.વી. ખેરના માર્ગદર્શન હેઠળ એસ.ઓ.જી.ની ટીમ પેટ્રોલિંગમાં હતી.દરમિયાન એસ.ઓ.જી. સ્ટાફના મયુરરાજસિંહ જાડેજા, બળભદ્રસિંહ જાડેજા તથા વિરેન્દ્રસિંહ જાડેજાને ખાનગી બાતમી મળી હતી કે એડિશનલ ચીફ જ્યુડિશિયલ મેજિસ્ટ્રેટ કોર્ટ દ્વારા નેગોશિએબલ ઇન્સ્ટ્રુમેન્ટ એક્ટના ગુનામાં સજા પામેલો અને છેલ્લા ૬ માસથી નાસતો ફરતો આરોપી મુકેશ મનજીભાઈ કગથરા નથુવડલા ગામ નજીક ગામના પાદર વિસ્તારમાં હાજર છે.જે બાતમીના આધારે એસ.ઓ.જી.ની ટીમે સ્થળ પર પહોંચી તપાસ કરતાં આરોપી મળી આવ્યો હતો. જેથી તેને કાયદેસરની કાર્યવાહી હેઠળ ઝડપી પાડી વધુ કાર્યવાહી માટે ધ્રોલ પોલીસ સ્ટેશનને સોંપવામાં આવ્યો હતો.
