Mumbai,તા.૫
તમિલનાડુમાં કાવેરી જળ વિવાદ પર આયોજિત રેલી દરમિયાન ઉદયનિધિ સ્ટાલિનની અભિનેત્રી ત્રિશા પરની વિવાદાસ્પદ ટિપ્પણીએ વિવાદ ઉભો કર્યો છે. આ ટિપ્પણી વાયરલ થયા બાદ, પોલીસે મંગળવારે ડીએમકે નેતા અને તમિલનાડુ વિધાનસભામાં વિરોધ પક્ષના નેતા ઉદયનિધિની તેમના નિવાસસ્થાનેથી અટકાયત કરી હતી. કંગના રનૌતે પણ આ ઘટના પર પ્રતિક્રિયા આપી છે.
કંગના રનૌત તેના સ્પષ્ટવક્તા માટે જાણીતી છે અને વિવિધ મુદ્દાઓ પર ખુલ્લેઆમ પોતાના વિચારો વ્યક્ત કરે છે. તેણીએ સોશિયલ મીડિયા પર ઉદયનિધિ સ્ટાલિનની ટિપ્પણીનો પણ જવાબ આપ્યો. કંગના રનૌતે સ્ટાલિનની અભદ્ર ટિપ્પણી બાદ પોલીસ કાર્યવાહીની પ્રશંસા કરી. તેણીએ કહ્યું કે આવા અભદ્ર મજાક અસ્વીકાર્ય છે.
કંગના રનૌતે તેની ઇન્સ્ટાગ્રામ સ્ટોરી પર એક પોસ્ટ શેર કરી. સ્ટાલિનની ધરપકડના સમાચાર શેર કરતા તેણીએ લખ્યું, “ગંદી ભાષાનો ઉપયોગ કરવો અને બેવડા અર્થવાળા, અશ્લીલ અને અભદ્ર મજાક કરવા કોઈપણ સભ્ય સમાજમાં અસ્વીકાર્ય છે. શ્રી સ્ટાલિનને આ ગુના માટે જેલમાં મોકલવામાં આવ્યા હતા. તેઓ હવે જામીન પર બહાર હોઈ શકે છે, પરંતુ આ એક સારું ઉદાહરણ છે.”
ત્રીશા કૃષ્ણન વિરુદ્ધ તેમની કથિત ટિપ્પણીના સંદર્ભમાં મંગળવારે સ્ટાલિનની ધરપકડ કરવામાં આવી હતી. મુખ્યમંત્રી સી. જોસેફ વિજયની પાર્ટી, ટીવીકે દ્વારા પોલીસ અને રાષ્ટ્રીય મહિલા આયોગમાં ફરિયાદ નોંધાવ્યા બાદ આ કાર્યવાહી કરવામાં આવી. ટીવીકેના તંજાવુર સેન્ટ્રલ ડિસ્ટ્રિક્ટ મહિલા પાંખના કન્વીનર એસ. બૈરવીએ તંજાવુર પૂર્વ પોલીસ સ્ટેશનમાં ઉદયનિધિ સ્ટાલિન વિરુદ્ધ ફરિયાદ નોંધાવી. ટીવીકેએ રાષ્ટ્રીય મહિલા આયોગમાં પણ ફરિયાદ નોંધાવી છે, જેમાં કાર્યવાહીની માંગ કરવામાં આવી છે. પોલીસ આ મામલાની તપાસ કરી રહી છે.
