Mumbai, તા.૩
નમિત મલ્હોત્રાના પ્રોડક્શન હાઉસ હેઠળ આકાર લઈ રહેલી ભવ્ય અને બહુપ્રતિક્ષિત ફિલ્મ ‘રામાયણ’ને લઈને દર્શકો અને સિનેપ્રેમીઓમાં જબરદસ્ત ઉત્સાહ જોવા મળી રહ્યો છે. મેકર્સ પણ ફેન્સના આ ઉત્સાહને સતત જાળવી રાખવા માટે કોઈ કસર છોડી રહ્યા નથી. તાજેતરમાં જ લક્ષ્મણના પાત્રમાં રવિ દુબેનો દમદાર લુક જાહેર કર્યા બાદ, હવે નિર્માતાઓએ માતા સીતાના દિવ્ય રૂપમાં Sai Pallaviનો પ્રોમો રિલીઝ કરીને સોશિયલ મીડિયા પર ધૂમ મચાવી દીધી છે.
ફિલ્મના નિર્માતા નમિત મલ્હોત્રાએ સોશિયલ મીડિયા પર સાઈ પલ્લવીનો આ ખાસ પ્રોમો શેર કર્યો છે, જેમાં તેમની અદ્ભુત સાદગી અને સૌમ્યતા સ્પષ્ટપણે જોવા મળે છે. પ્રોમો શેર કરતા કૅપ્શનમાં લખવામાં આવ્યું છે- ધરતીની પુત્રી, મિથિલાની રાજકુમારી, પ્રેમથી બંધાયેલી અને ધર્મથી પ્રેરિત. સીતાજીના રૂપમાં સાઈ પલ્લવી, પ્રોમો આવી ગયો છે. ૫ નવેમ્બરથી વિશ્વભરના સિનેમાઘરોમાં, તમામ પ્રીમિયમ ફોર્મેટ્સમાં રામાયણનો અનુભવ લો.આ પ્રોમોમાં સાઈ પલ્લવીને માતા સીતાના જીવનના જુદા જુદા ચરણોમાં દર્શાવવામાં આવી છે. વિવાહ પહેલાંની મિથિલાની રાજકુમારીની ઝલક, પ્રભુ શ્રી રામ સાથેના વિવાહ પછીનું રૂપ અને વનવાસના કઠિન દિવસોની ઝાંખીમાં સાઈ પલ્લવીના ચહેરા પરની પવિત્રતા અને સાદગી દર્શકોના દિલ જીતી રહી છે.
