અગાઉ દીપિકા પાદુકોણે ફિલ્મમાંથી બહાર નીકળી હોવાના અહેવાલોએ પણ ભારે ચર્ચા જગાવી હતી
Mumbai,, તા.૨૮
કેટરિના કૈફના આગામી ફિલ્મી પ્રોજેક્ટને લઈને ચાલી રહેલી અટકળો પર હવે પૂર્ણવિરામ મુકાઈ ગયું છે. છેલ્લા કેટલાક દિવસોથી એવા અહેવાલો સામે આવી રહ્યા હતા કે કેટરિના સંદીપ રેડ્ડી વાંગાની એક્શન ફિલ્મ ‘સ્પિરિટ’માં પ્રભાસની સાથે જોવા મળશે. તેમાં એવું પણ કહેવાયું હતું કે ફિલ્મની વાર્તાને આગળ વધારે એવા મહત્વના કેમિયો માટે કેટરિનાની પસંદગી કરવામાં આવી હોવાનું કહેવાયું હતું. જોકે, હવે ઇન્ડસ્ટ્રી સાથે સંકળાયેલા સુત્રોએ આ તમામ દાવાઓને બિલકુલ ખોટા અને ભ્રામક ગણાવ્યા છે.૨૦૨૪માં આવેલી ‘મેરી ક્રિસમસ’ બાદ કેટરિના કૈફ મોટા પડદાથી દૂર છે. સપ્ટેમ્બર ૨૦૨૫માં પ્રેગનન્સીની જાહેરાત અને નવેમ્બર ૨૦૨૫માં પુત્રને જન્મ આપ્યા બાદ તેનાં કમબેકને લઈને સતત ચર્ચાઓ ચાલી રહી છે. આ દરમિયાન એવી અટકળો તેજ બની હતી કે તે લગભગ બે દાયકાં બાદ તેલુગુ ફિલ્મોમાં વાપસી કરવા જઈ રહી છે અને ‘સ્પિરિટ’માં પ્રભાસ સાથે સ્ક્રીન શેર કરશે.જોકે, નજીકના સુત્રોએ આ અહેવાલોને સંપૂર્ણપણે નકારી કાઢ્યા છે. સુત્રોના જણાવ્યા મુજબ, “કેટરિના કૈફની આગામી ફિલ્મો અંગે ચાલી રહેલા દાવાઓમાં કોઈ જ સત્ય નથી. આ તમામ અહેવાલો માત્ર અટકળો અને ખોટી માહિતી પર આધારિત છે. તેની કોઈ સત્તાવાર પુષ્ટિ કરવામાં આવી નથી.”ઉલ્લેખનીય છે કે ફિલ્મની જાહેરાત બાદથી જ ‘સ્પિરિટ’ સતત ચર્ચામાં રહી છે. ફિલ્મની કાસ્ટિંગને લઈને અનેક નામો સામે આવ્યા હતા. શરૂઆતમાં કરીના કપૂર ખાન અને સૈફ અલી ખાન મહત્વના રોલમા હશે તેવી ચર્ચા હતી.ત્યારબાદ દીપિકા પાદુકોણે ફિલ્મમાંથી બહાર નીકળી હોવાના અહેવાલોએ પણ ભારે ચર્ચા જગાવી હતી. અહેવાલો અનુસાર, ફી અને કામકાજની શરતો અંગે મતભેદોને કારણે દીપિકાએ ફિલ્મ છોડી દીધી હતી. બાદમાં તેની જગ્યાએ તૃપ્તિ ડિમરીને લેવામાં આવી હતી, જેણે અગાઉ સંદીપ રેડ્ડી વાંગા સાથે ‘એનિમલ’માં કામ કર્યું હતું.‘સ્પિરિટ’માં પ્રભાસ, તૃપ્તિ ડિમરી ઉપરાંત વિવેક ઓબેરોય પણ મહત્વના રોલમાં જોવા મળશે. સંદીપ રેડ્ડી વાંગાની આ ફિલ્મ ૫ માર્ચ, ૨૦૨૭ના રોજ રિલીઝ થવાની છે.
