આઠ દિવસના પેનડાઉન અને માસ સીએલ બાદ કચેરીના દરવાજા બંધ કરી કર્મચારી અચોક્કસ મુદતની હડતાલ પર ઉતરી ગયા
Bhavnagar, તા.૨૨
બહુમાળી ભવન સ્થિત લેન્ડ રેકર્ડઝ કચેરી વર્ગ-૩ના કર્મચારીઓની લાંબા સમયથી પગાર વધારાની માંગણી નહીં સંતોષાતા તબક્કાવાર વિરોધ કાર્યક્રમ આગળ વધી રહ્યો છે અને આજથી આ તમામ કર્મચારીઓ કચેરીના દરવાજા બંધ કરી અચોક્કસની મુદતે હડતાલ ઉપર ઉતરી ગયા છે. જેના કારણે અગત્યના અનેક કામો અટકી પડયા હતાં.મળતી વિગતો મુજબ ભાવનગર લેન્ડ રેકર્ડઝ કચેરીના વર્ગ-૩ના કર્મચારીઓ દ્વારા સિનીયર સર્વેયર સંવર્ગનું પગાર ધોરણ રૃા.૨૯,૨૦૦ – ૯૨,૩૦૦, પે પેટીક્ષ લેવલ-૫ (ગ્રેડ પે ૨૮૦૦)માંથી પગાર ધોરણ ૩૯,૯૦૦-૧,૨૬,૬૦૦ પે મેટ્રીક્ષ લેવલ-૭ (ગ્રેડ પે ૪૪૦૦) કરવા તથા સર્વેયર સંવર્ગનું પગાર ધોરણ રૃા.૨૫,૫૦૦-૮૧,૧૦૦, પે મેટ્રીક્ષ લેવલ-૪ (ગ્રેડ પે ૨૪૦૦)માંથી ૨૯૨૦૦, ૧૨,૩૦૦, પે મેટ્રીક્ષ લેવલ-૫ (ગ્રેડ પે ૨૮૦૦)માં કરવા સહિતની માંગણીઓ સરકારમાં કરાઇ હતી. જો કે, આ માંગણી અંગે કોઇ હકારાત્મક નિર્ણય નહીં આપતા ગત ૧૯ સપ્ટેમ્બરના રોજ રાજ્ય લેન્ડ રેકર્ડઝ વર્ગ-૩ કર્મચારી મંડળ દ્વારા અલ્ટીમેટમ અપાયું હતું અને ગઇ તા.૧૧ થી ૧૮ સપ્ટેમ્બર દરમિયાન કર્મચારીઓ કચેરીમાં હાજર રહી પેનડાઉન કર્યું હતું.
જ્યારે તા.૧૯ના રોજ તમામ કર્મચારી માસ સીએલ પર ગયા હતા અને આજથી લેન્ડ રેકર્ડઝના વર્ગ-૩ના તમામ કર્મચારીઓ કચેરીના દરવાજા બંધ કરી અચોક્કસ મુદતની હડતાલ પર ઉતરી ગયા હતાં. બહુમાળી ભવનના બેઝમેન્ટમાં આ તમામ કર્મચારીઓ એકત્ર થઇ સૂત્રોચ્ચાર સાથે પોતાના પડતર પ્રશ્નોનું નિરાકરણ લાવવા સૂત્રોચ્ચાર સાથે માંગણી કરી હતી. આમ ગઇ તા.૧૧ થી લેન્ડ રેકર્ડની તમામ કામગીરી અટકી પડતા નામ ટ્રાન્સફર, નોંધ પાડવી, પ્રોપર્ટી કાર્ડ, માપણી શીટ બનાવવી સહિતના સંલગ્ન કામો અટકી પડતા અરજદારોને પણ ભારે હાલાકીનો સામનો કરવાનો વારો આવ્યો છે. જ્યારે આ અચોક્કસ મુદતની હડતાલ ક્યારે પૂર્ણ થશે તે પણ અનિશ્ચિત હોવાનું જણાય છે.
