બાંટવામાં પરવાનગી વગર અને જોખમી રીતે સંગ્રહ કરાયેલા રૂ. ૧૨.૨૫ લાખના ફટાકડા સાથે એક શખ્સ ઝડપાયો , પોલીસે તપાસ હાથ ધરી
જીજ્ઞેશ પટેલ
Manavadar તા.૨૮ઃ
જૂનાગઢ જિલ્લામાં આગામી દિવાળીના તહેવારોને ધ્યાનમાં રાખીને કાયદો અને વ્યવસ્થા જળવાઈ રહે તથા કોઈ અનિચ્છનીય બનાવ ન બને તે માટે પોલીસ દ્વારા સઘન પેટ્રોલિંગ અને ગેરકાયદેસર પ્રવૃત્તિઓ વિરુદ્ધ વિશેષ ઝુંબેશ હાથ ધરવામાં આવી છે. આ દરમિયાન બાંટવા પોલીસ સ્ટેશન વિસ્તારમાં ગેરકાયદેસર રીતે ફટાકડાનો સંગ્રહ કરવામાં આવ્યો હોવાની બાતમી મળી હતી. આ બાતમીના આધારે બાંટવા ટાઉનમાં લોહાણા સમાજની બાજુમાં ઘેલી નદીના કાંઠે જૂના પોલીસ સ્ટેશનની સામે આવેલા ૩ ગોડાઉનમાં ઓચિંતી રેડ કરવામાં આવી હતી. તપાસ દરમિયાન આ ગોડાઉનોમાં અલગ-અલગ બ્રાન્ડના ફટાકડાના પુંઠાના કાર્ટુન તથા છૂટા ફટાકડાનો જથ્થો મોટા પ્રમાણમાં મળી આવ્યો હતો.
તપાસ દરમિયાન પકડાયેલા ઇસમ સૂર્યકાંત હરીલાલ તન્ના (ઉંમર વર્ષ ૬૭, રહે. બાંટવા, લોહાણા સમાજ પાસે, તા. માણાવદર) પાસે આ ફટાકડા રાખવા અંગે કોઈ પણ પ્રકારનો પાસ, પરવાનો કે લાયસન્સ ન હોવાનું સામે આવ્યું હતું. આ ગોડાઉનોમાં માનવ જિંદગી જોખમાય તેવી ગંભીર બેદરકારી જોવા મળી હતી, જ્યાં આગ કે અકસ્માત જેવી આકસ્મિક પરિસ્થિતિને પહોંચી વળવા માટે રેતી ભરેલી ડોલ, ફાયર સેફ્ટીના સાધનો કે વોટર સ્પ્રિંકલરની કોઈ જ વ્યવસ્થા નહોતી. એટલું જ નહીં,સુરક્ષા માટે સીસીટીવી કેમેરા પણ લગાવવામાં આવ્યા ન હતા અને માત્ર પ્રથમ ગોડાઉનમાં ૨ નાના એક્સપાયર થયેલા ફાયર સેફ્ટીના બાટલા જોવા મળ્યા હતા. પૂછપરછમાં આ ત્રણેય ગોડાઉન પરેશ મગનલાલ રાયચુરાનામના શખ્સ પાસેથી ફટાકડાનો સંગ્રહ કરવા માટે ભાડે રાખવામાં આવ્યા હોવાનું બહાર આવ્યું હતું.
પોલીસે સુર્યકાંત હરીલાલ તન્નાને સાથે રાખીને હાથ ધરેલી સઘન તપાસમાં કુલ રૂપિયા ૧૨,૨૫,૮૬૮/- ની કિંમતનો વિપુલ પ્રમાણમાં ફટાકડાનો જથ્થો કબ્જે કર્યો છે. આ ગેરકાયદેસર પ્રવૃત્તિ બદલ પકડાયેલા ઇસમ વિરુદ્ધ બાંટવા પોલીસ સ્ટેશન ખાતે ભારતીય ન્યાય સંહિતા-૨૦૨૩ ની કલમ-૧૨૫, ૨૮૭, ૨૮૮ તથા સ્ફોટક પદાર્થ અધિનિયમ-૧૮૮૪ ની કલમ-૯ બી(૧-બી) મુજબ ધોરણસરની કાયદેસરની ગુનાહિત કાર્યવાહી કરવામાં આવી છે. આગામી દિવાળીના તહેવારોને અનુલક્ષીને પોલીસ દ્વારા સ્પષ્ટ ચેતવણી આપવામાં આવી છે કે કોઈપણ પ્રકારના લાયસન્સ કે પરવાનગી વગર તથા માનવ જિંદગી જોખમાય તે રીતે ફટાકડાનું અનધિકૃત વેચાણ કે સંગ્રહ કરનાર ઈસમો સામે કડકમાં કડક કાયદેસરના પગલાં લેવામાં આવશે
