New Delhi, તા. 5
લાલ સમુદ્ર (Red Sea) માં યમન કિનારા નજીક એક ભારતીય ધ્વજ ધરાવતાં માલવાહક જહાજ પર અજ્ઞાત દિશામાંથી મિસાઇલ અથવા પ્રોજેક્ટાઇલ વડે હુમલો કરવામાં આવ્યો હતો, જેનાં કારણે જહાજ સમુદ્રમાં પલટી મારીને ડૂબી ગયું હતું.
`MSV ફેઝ નૂરે ઓલિયા’ નામનાં આ જહાજ પર કુલ 14 ક્રૂ સભ્યો સવાર હતાં. ઘટનાની જાણ થતાં જ યમન કોસ્ટ ગાર્ડે ત્વરિત રેસ્ક્યૂ ઓપરેશન હાથ ધરીને તમામ સભ્યોને સુરક્ષિત રીતે બહાર કાઢી યમનના મોખા બંદર પર પહોંચાડ્યા હતાં.
ડૂબેલાં જહાજ પર સવાર ક્રૂ સભ્યોમાં 13 ભારતીય નાગરિકો અને 1 વિદેશી નાગરિકનો સમાવેશ થતો હતો. કેન્દ્રીય બંદર અને જહાજ પરિવહન મંત્રી સરબાનંદ સોનોવાલે આ અંગે રાહત વ્યક્ત કરતાં જણાવ્યું હતું કે, જહાજ પરનાં તમામ 14 ખલાસીઓ સંપૂર્ણપણે સુરક્ષિત છે.
આ સાથે તેમણે ડાયરેક્ટર જનરલ મેરિટાઇમ એડમિનિસ્ટ્રેશન (DGMA) ને આ વિસ્તારમાં ભારતીય ખલાસીઓની સુરક્ષા વધારવા અને બચાવવામાં આવેલાં ક્રૂને તમામ જરૂરી સહાય પૂરી પાડવાનો નિર્દેશ આપ્યો છે.
ભારતનાં વિદેશ મંત્રાલયે આ ઘટના અંગે સખત વિરોધ નોંધાવ્યો છે અને નિરપરાધ તથા અસુરક્ષિત નાગરિક જહાજ પર થયેલાં આ હુમલાને `બિનઉશ્કેરણીજનક’ ગણાવ્યો છે. રિયાધ સ્થિત ભારતીય દૂતાવાસ યમનની સ્થાનિક સત્તાવાળાઓ સાથે સતત સંપર્કમાં છે અને પરિસિ્થતિ પર નજર રાખી રહ્યું છે. ભારત સરકારે આ મુશ્કેલ સમયમાં ત્વરિત મદદ કરવા બદલ યમનની સરકાર અને તેમનાં કોસ્ટ ગાર્ડનો આભાર માન્યો છે.
લાલ સમુદ્ર અને બાબ અલ-મંદેબની સામુદ્રધુની એશિયા અને યુરોપ વચ્ચેના વૈશ્વિક વેપાર માટે અત્યંત મહત્વપૂર્ણ દરિયાઈ માર્ગ છે. છેલ્લા કેટલાક સમયથી ઈરાન સમર્થિત હુથી વિદ્રોહીઓ દ્વારા આ માર્ગ પરથી પસાર થતાં જહાજો પર ડ્રોન અને મિસાઈલ વડે સતત હુમલા કરવામાં આવી રહ્યાં છે, જેના કારણે આંતરરાષ્ટ્રીય દરિયાઈ સુરક્ષા જોખમાઈ છે.
