(મિલાપ રૂપારેલ)
Amreli, તા.13
અમરેલી શહેરમાં 80મા સ્વાતંત્ર્ય પર્વની ઉજવણીની તૈયારીઓ વચ્ચે પાલિકાની સફાઈ વ્યવસ્થાને લઈને અમરેલી નગરપાલિકા પ્રમુખ વૈશાલી માંગરોળિયાનો આક્રોશ સામે આવ્યો છે.
મુખ્યમંત્રીના સંભવિત રૂટ સહિત શહેરના વિવિધ વિસ્તારોમાં રિયાલિટી ચેકિંગ દરમિયાન કચરાના ઢગલા અને ગંદકી જોવા મળતા પાલિકા પ્રમુખે સ્થળ પર જ અધિકારીઓને ખખડાવ્યા હતા. સમગ્ર ઘટનાનો વીડિયો સોશિયલ મીડિયામાં વાયરલ થતાં પાલિકાની સફાઈ કામગીરીને લઈને ચર્ચા શરૂ થઈ છે.
પ્રાપ્ત વિગતો મુજબ, સ્વાતંત્ર્ય પર્વની ઉજવણીની તૈયારીઓના ભાગરૂપે શહેરમાં સફાઈ સહિતની વ્યવસ્થાઓનું નિરીક્ષણ કરવામાં આવી રહ્યું હતું. આ દરમિયાન મુખ્યમંત્રીના રૂટ ચિતલ રોડ ઉપર જ કચરાના ઢગલા અને ગંદકી જોવા મળતાં પાલિકા પ્રમુખ વૈશાલી માંગરોળિયા ભારે નારાજ થયા હતા. તેમણે તાત્કાલિક ચીફ ઓફિસર તેમજ આરોગ્ય વિભાગના અધિકારીઓને સ્થળ પર બોલાવી સફાઈ વ્યવસ્થાને લઈને ઉગ્ર રજૂઆત કરી હતી.
પાલિકા પ્રમુખે અધિકારીઓને સફાઈ કામગીરીમાં બેદરકારી બદલ જવાબદાર ઠેરવી કડક શબ્દોમાં ટકોર કરી હતી. સાથે જ અમરેલીના ધારાસભ્ય તથા રાજ્યના ઉર્જામંત્રીને મોબાઈલ મારફતે જાણ કરી પાલિકાના અધિકારીઓ પોતાની વાતને ગાંઠતા ન હોવાની રજૂઆત કરી હોવાનો પણ દાવો કરવામાં આવ્યો છે.
શહેરમાં ઠેર-ઠેર ગંદકી જોવા મળતા પાલિકા પ્રમુખનો આક્રોશ કેમેરામાં કેદ થયો હતો અને આ વીડિયો સોશિયલ મીડિયામાં વાયરલ થયો છે. ભાજપ શાસિત અમરેલી નગરપાલિકાના પ્રમુખ દ્વારા જ સફાઈ વ્યવસ્થાને લઈને અધિકારીઓ સામે નારાજગી વ્યક્ત કરવામાં આવતા પાલિકાની કામગીરી અંગે પણ સવાલો ઉઠી રહ્યા છે.
