(મિલાપ રૂપારેલ)
Amreli, તા.13
ધારીમાં પ્રાંત કલેકટર કચેરી અને મામલતદાર કચેરીની બાજુમાં આવેલી સરકારી પેટા તિજોરી કચેરીમાં અચાનક અજગર ઘૂસી આવતાં કચેરીમાં હાજર લોકોમાં ફફડાટ ફેલાયો હતો.
મળતી માહિતી મુજબ જંગલ વિસ્તાર છોડીને અજગર સરકારી કચેરીના પરિસરમાં આવી પહોંચ્યો હતો. કચેરીમાં અજગર દેખાતા આસપાસના લોકોમાં પણ ભારે કુતૂહલ સાથે ભયનો માહોલ સર્જાયો હતો. અજગરને જોવા માટે લોકોનાં ટોળેટોળાં એકઠાં થઈ ગયાં હતાં.
આ ઘટનાની જાણ થતાં ધારીના સેવાભાવી રમેશ કાતરીયા સ્થળ પર પહોંચ્યા હતા અને ચપળતા પૂર્વક અજગરનું રેસ્ક્યૂ કર્યું હતું. સફળતાપૂર્વક પકડાયેલા અજગરને સલામત રીતે આંબરડી સફારી પાર્ક નજીક આવેલા જંગલ વિસ્તારમાં લઈ જઈ મુક્ત કરવામાં આવ્યો હતો.
અત્રે ઉલ્લેખનીય છે કે, થોડા દિવસ અગાઉ બગસરા પંથકમાં પણ અજગર દેખાયા હતા. અમરેલી જિલ્લામાં જંગલ વિસ્તારની આસપાસ આવેલા રહેણાંક અને કચેરી વિસ્તારોમાં અવારનવાર વન્યજીવો દેખા દેતા હોય છે.
