Rajkot: આટકોટ નજીક પીકઅપવાનની અડફેટે રાહદારીનું મોત

Rajkot,તા.11

રાજકોટ-ભાવનગર હાઈવે પર આવેલ જંગવડ ગામની સીમમાં પુરઝડપે આવતી બોલેરો પીકઅપ ગાડીએ રોડ ક્રોસ કરી રહેલા આશરે ૨૫ થી ૩૦ વર્ષના અજાણ્યા યુવકને અડફેટે લેતા યુવકનું ઘટનાસ્થળે જ મોત નીપજ્યું હતું, ઘટના બાદ આટકોટ પોલીસે બોલેરો ચાલક સામે ગુનો નોંધી વધુ તપાસ હાથ ધરી છે.પ્રાપ્ત વિગતો મુજબ, જંગવડ ગામની સીમમાં તાજ હોટેલ નજીક અકસ્માત થયા અંગેની જાણ ૧૧૨ જનરક્ષકને મળતા જ આટકોટ પોલીસ મથકના પોલીસ હેડ કોન્સ્ટેબલ દશરથભાઈ કાકડીયા તથા સ્ટાફ ઘટના સ્થળે પહોચ્યો હતો, પોલીસ ટીમને ઘટનાસ્થળે પીકઅપ વાહન રોડથી નીચે ઊંધી હાલતમાં પડેલું મળી આવ્યું હતું, જ્યારે ગાડીની બાજુમાં આવેલ મગફળીના વાવેતરમાં એક ૨૫ થી ૩૦ વર્ષનો અજાણ્યો યુવક લોહીલુહાણ અને બેભાન અવસ્થામાં પડેલો હતો, ૧૦૮ ના સ્ટાફે તપાસીને અજાણ્યા યુવકને મૃત જાહેર કર્યો હતો. મૃતક પાસેથી ઓળખતો કોઈ પુરાવો ન મારતા પોલીસ દ્વારા મૃતદેહને પીએમ અર્થે જસદણ હોસ્પિટલ ખસેડવામાં આવ્યો હતો, પોલીસ તપાસમાં જાણવા મળ્યું છે કે, બોલેરો પીકઅપનો ચાલક ફારૂકભાઈ રજાકભાઈ ફોગ (રહે આટકોટ) પોતાનું વાહન પુરઝડપે અને લોકોના જીવ જોખમાય તે રીતે ચલાવીને આવી રહ્યો હતો, આ દરમિયાન રોડ ક્રોસ કરી રહેલા અજાણ્યા યુવકને અડફેટે લેતા અકસ્માત સર્જાયો હતો, અને અજાણ્યા યુવકનું ઘટનાસ્થળે જ મોત નીપજ્યું હતું, હાલ પોલીસે અજાણ્યા યુવકના વાલીવારસની શોધખોળ હાથ ધરી છે. આ અંગે આટકોટ પોલીસ સ્ટેશનના પોલીસ હેડ કોન્સ્ટેબલ દશરથભાઈ કાકડિયાની ફરિયાદના આધારે બોલેરો ચાલક વિરુદ્ધ ગુનો નોંધી વધુ તપાસ હાથ ધરી છે.