Patna,તા.૧૦
દિલ્હી વિધાનસભા ચૂંટણીમાં ભારતીય જનતા પાર્ટીને મોટી જીત મળી છે. આ અંગે વિપક્ષી પક્ષોના નેતાઓના નિવેદનો સતત સામે આવી રહ્યા છે. દરમિયાન, રાષ્ટ્રીય જનતા દળના નેતા અને બિહાર વિધાનસભામાં વિરોધ પક્ષના નેતા તેજસ્વી યાદવે કહ્યું કે દિલ્હી વિધાનસભા ચૂંટણીમાં ભાજપની જંગી જીતની બિહાર વિધાનસભા ચૂંટણી પર કોઈ અસર પડશે નહીં. આ વર્ષના અંતમાં બિહાર વિધાનસભાની ચૂંટણીઓ યોજાવાની છે. બિહારના ભૂતપૂર્વ નાયબ મુખ્યમંત્રીએ કહ્યું કે લોકશાહીમાં જનતા જ માલિક હોય છે.
દિલ્હીમાં ભાજપની જીત અંગે તેજસ્વી યાદવે કહ્યું, “ભાજપને લગભગ ૨૬ વર્ષ પછી દિલ્હીમાં સત્તા મળી છે. આશા છે કે હવે ભાજપ લોકોને આપેલા વચનો પૂરા કરશે અને જુમલાબાજીનો યુગ સમાપ્ત થશે.” જ્યારે ભાજપ અને તેના સાથી પક્ષોના દાવાઓ કે દિલ્હીમાં જીતથી બિહાર વિધાનસભા ચૂંટણીમાં ફાયદો થશે, તે અંગે પૂછવામાં આવ્યું ત્યારે તેજસ્વીએ જવાબ આપ્યો, “બિહાર બિહાર છે. આપણે આ સમજવું પડશે.” તેમના નિવેદનથી સ્પષ્ટ થાય છે કે યાદવે બિહારની અલગ ઓળખ અને સ્થિતિને મહત્વપૂર્ણ ગણાવી છે.
બિહારના રાજકીય સંદર્ભમાં પોતાના વિચારો વ્યક્ત કરતા તેમણે કહ્યું કે બિહારમાં છેલ્લી બે વિધાનસભા ચૂંટણીમાં આરજેડી સૌથી મોટી પાર્ટી તરીકે ઉભરી આવી છે અને આ વખતે પણ પાર્ટી પોતાની સ્થિતિ મજબૂત કરવામાં સફળ રહેશે. તમને જણાવી દઈએ કે બિહારમાં દ્ગડ્ઢછનું નેતૃત્વ મુખ્યમંત્રી નીતિશ કુમાર કરી રહ્યા છે. નીતિશ કુમાર ૨૦૦૫ થી બિહારના મુખ્યમંત્રી છે, જોકે થોડા સમય માટે તેમણે મુખ્યમંત્રી પદ જીતન રામ માંઝીને સોંપ્યું હતું. નીતિશ કુમારે બે વાર આરજેડી સાથે ટૂંકા ગાળાનું ગઠબંધન પણ કર્યું છે.
