Ahmedabad તા.17
અમદાવાદ શહેરમાં નશીલા પદાર્થોના વધતા જાળ સામે એન્ટી નાર્કોટિક્સ ટાસ્ક ફોર્સે મોટું ઓપરેશન હાથ ધરી બોપલ વિસ્તારમાં ચાલતા ડ્રગ્સ કારોબારનો પર્દાફાશ કર્યો છે. રાજકોટના એક યુવકને ઝડપીને પોલીસે આંતરરાજ્ય ડ્રગ્સ નેટવર્ક અંગે વધુ તપાસ શરૂ કરી છે, જેનાથી મોટી સિન્ડિકેટ બહાર આવવાની શક્યતા વ્યક્ત કરવામાં આવી રહી છે.
મળતી માહિતી મુજબ, અમદાવાદના બોપલ વિસ્તારમાં આવેલ આરોહી વિવીઆના એપાર્ટમેન્ટમાં ફ્લેટ ભાડે રાખીને ડ્રગ્સનું વેચાણ કરતો રાજકોટનો નિશાંત ભાનુભાઈ સોલંકી (ઉ.વ. 42) એન્ટી નાર્કોટિક્સ ટાસ્ક ફોર્સ (ANTF)ના હાથે ઝડપાયો છે. ચોક્કસ બાતમીના આધારે પી.આઈ. એમ.એન. આદરોજા તથા ટીમે દરોડો પાડતાં સમગ્ર ડ્રગ્સ કારોબારનો ભાંડાફોડ થયો હતો.
પોલીસ તપાસ દરમિયાન ફ્લેટમાંથી 8.88 ગ્રામ કોકેન (કિંમત રૂ. 4.44 લાખ), 102.59 ગ્રામ મેથએમ્ફેટેમાઈન (રૂ. 10.25 લાખ) અને 46.64 ગ્રામ હાઈબ્રિડ ગાંજાનો જથ્થો મળી આવ્યો હતો. આ ઉપરાંત બેડરૂમમાંથી 6 દારૂની બોટલો, 24 બિયર ટીન, 4 મોબાઈલ ફોન અને 10 ઇન્સ્યુલિન સિરિંજ પણ કબ્જે કરવામાં આવ્યા છે. દરોડા સમયે આરોપીને મળવા માટે મધ્યપ્રદેશના ગ્વાલિયરની પ્રિયા નામની યુવતી પણ ફ્લેટમાં હાજર હતી, પરંતુ તેની કોઈ સંડોવણી ન હોવાનું પ્રાથમિક તપાસમાં સામે આવ્યું છે.
તપાસમાં બહાર આવ્યું છે કે, નિશાંત સોલંકી છેલ્લા ત્રણ મહિનાથી પરિવારથી અલગ રહીને બોપલમાં ભાડાના ફ્લેટમાં રહેતો હતો અને ત્યાંથી ડ્રગ્સનો કારોબાર ચલાવતો હતો. તેણે ફ્લેટ રૂ. 33,000ના ભાડે લીધો હતો. આરોપી પોતાના ગ્રાહકો સાથે સંપર્કમાં રહેવા માટે ચાર અલગ-અલગ મોબાઈલ ફોનનો ઉપયોગ કરતો હતો
નિશ્ચિત ગ્રાહકોને જ ડ્રગ્સ સપ્લાય કરતો હતો. આરોપીએ પોલીસ સમક્ષ કબૂલાત કરી છે કે તે દિલ્હીના ઘોસ્ટ નામથી ઓળખાતા ડીલર પાસેથી ડ્રગ્સ મંગાવતો હતો. આ ઉપરાંત અમદાવાદના અડાલજ વિસ્તારમાં રહેતા સાન્દ્રા અને રીક નામના શખ્સો મારફતે સંપર્ક સાધીને ડ્રગ્સ મંગાવતો હતો.
પોલીસે વધુમાં જણાવ્યું છે કે, આરોપી પોતે પણ ડ્રગ્સના વ્યસનમાં હતો અને તે જ કારણસર આ ગેરકાયદેસર કારોબારમાં પ્રવેશ્યો હતો. ડ્રગ્સના જથ્થા સાથે મળી આવેલી ઇન્સ્યુલિન સિરિંજ પરથી પોલીસે આ દિશામાં પણ તપાસ શરૂ કરી છે.
એન્ટી નાર્કોટિક્સ ટાસ્ક ફોર્સના અધિકારીઓએ જણાવ્યું છે કે, આ કાર્યવાહીથી પશ્ચિમ અમદાવાદમાં ફેલાયેલા મોટા ડ્રગ્સ સિન્ડિકેટનો પર્દાફાશ થવાની શક્યતા છે. પોલીસે આરોપી પાસેથી મળેલા મોબાઈલ ફોનના ડેટા, કોલ રેકોર્ડ અને નેટવર્કને આધારે વધુ તપાસ શરૂ કરી છે.
