Ahmedabad, તા.9
માર્ગ અકસ્માતોમાં `ગોલ્ડન અવર’ એટલે કે પ્રથમ કલાકમાં મદદ ન મળવાને કારણે દર વર્ષે હજારો લોકો જીવ ગુમાવે છે. આ સમસ્યાના ઉકેલ માટે સુરતના યુવાન સંપત સારસતે `ઇકો ભારત’ નામનું એક એવું સ્ટાર્ટઅપ શરૂ કર્યું છે, જે રોડ સેફ્ટી ક્ષેત્રે ડિજિટલ ક્રાંતિ લાવી રહ્યું છે.
આ સિસ્ટમ દ્વારા વાહનચાલકની તમામ કટોકટીની વિગતો માત્ર એક QR કોડમાં સમાઈ જાય છે.વાહનના વિન્ડશીલ્ડ પર લગાવવામાં આવેલો આ સ્માર્ટ QR કોડ અકસ્માત સમયે દેવદૂત સમાન સાબિત થાય છે.
જ્યારે કોઈ રાહદારી આ કોડ સ્કેન કરે છે, ત્યારે તેને વાહનચાલકનું બ્લડ ગ્રુપ, ઇમર્જન્સી કોન્ટેક્ટ અને ઇન્શ્યોરન્સની માહિતી તુરંત મળી રહે છે. સ્કેન કરનાર વ્યક્તિ પાસે એમ્બ્યુલન્સ બોલાવવા, પરિવારને જાણ કરવા કે લોકેશન શેર કરવાના વિકલ્પો હોય છે.
ડેટા પ્રાઇવેસી એક્ટ હેઠળ કોલર કે રિસીવર એકબીજાનો મોબાઈલ નંબર જોઈ શકતા નથી, જેથી લોકોની સુરક્ષા અને ઓળખ ગુપ્ત રહે છે.
એપના ફીચર્સ
1) બ્લેક સ્પોટ એલર્ટઃ હાઇવે પર જોખમી વળાંક કે `બ્લાઈન્ડ સ્પોટ’ આવતા પહેલા 3 કિમી અગાઉ વોઈસ એલર્ટ આપે છે.
2) ઓટોમેટિક બ્રેક-ડાઉન ડિટેક્શનઃ જો વાહન અચાનક ઉભું રહી જાય, તો એપ ડ્રાઈવરને મેસેજ કરે છે. જો જવાબ ન મળે, તો આપમેળે લોકેશન સાથેનો મેસેજ પરિવારને પહોંચી જાય છે.
આ ટેકનોલોજીને દરેક સામાન્ય માનવી સુધી પહોંચાડવા માટે તેના ભાવ અત્યંત નજીવા રાખવામાં આવ્યા છેઃ ટુ-વ્હીલરઃ 5 વર્ષ માટે માત્ર 99 (માસિક ખર્ચ આશરે 1.50). ફોર-વ્હીલરઃ 5 વર્ષ માટે માત્ર 199 (માસિક ખર્ચ આશરે 3.50).
ન્યાયતંત્ર અને 26 રાજ્યોમાં સ્વીકૃતિ
આ સિસ્ટમની સફળતા જોઈને પંજાબ અને હરિયાણા હાઈકોર્ટે તેને 11 ફેબ્રુઆરી 2025થી ફરજિયાત બનાવી છે. હાલમાં ન્યાયતંત્રના 166થી વધુ વાહનો પર આ કોડ કાર્યરત છે.
દેશના 26 રાજ્યોમાં પ્રસરી રહેલું આ સ્ટાર્ટઅપ હવે રોડ સેફ્ટી માટે સરકારનું પણ સમર્થન મેળવી રહ્યું છે. “અમારો ઉદ્દેશ્ય નફો કમાવવાનો નથી, પણ ટેકનોલોજીના માધ્યમથી રસ્તા પર કિંમતી જીવ બચાવવાનો છે.”
