Ahmedabad,તા.08
અમદાવાદ સહિત સમગ્ર રાજ્યમાં ઉનાળાનો આકરો મિજાજ જોવા મળી રહ્યો છે. હવામાન વિભાગની આગાહી મુજબ, આગામી બે દિવસમાં અમદાવાદનું તાપમાન 44 ડિગ્રીને પાર કરી જાય તેવી પૂરેપૂરી સંભાવના છે. ગરમીના વધતા પ્રકોપને ધ્યાનમાં રાખીને શહેરમાં આગામી પાંચ દિવસ માટે ‘યલો ઍલર્ટ’ જાહેર કરવામાં આવ્યું છે.
મળતી માહિતી અનુસાર, ગઈકાલે (સાતમી મે) અમદાવાદ 43.2 ડિગ્રી સેલ્સિયસ તાપમાન સાથે રાજ્યનું સૌથી ગરમ શહેર નોંધાયું હતું. સરેરાશ મહત્તમ તાપમાનમાં સામાન્ય કરતાં 1.7 ડિગ્રીનો વધારો જોવા મળ્યો છે. હવામાન વિભાગના આંકડા મુજબ, 10 મે સુધી તાપમાન 43 ડિગ્રીની આસપાસ રહેશે. 11મી અને12મી મેના રોજ પારો ઉછળીને 44 ડિગ્રીએ પહોંચવાની શક્યતા છે. જો કે, હવામાન નિષ્ણાતોના મતે વાસ્તવિક તાપમાન 44થી 45 ડિગ્રી સુધી પણ જઈ શકે છે, જે નાગરિકો માટે મુશ્કેલી સર્જી શકે છે.
