New Delhi,તા.૨૬
રાજસ્થાન મુસ્લિમ ગઠબંધનના પ્રમુખ મોહસીન રશીદે કોંગ્રેસ પાર્ટી હાઇકમાન્ડને અપીલ કરી હતી કે જેલમાં બંધ ભૂતપૂર્વ જેએનયુ વિદ્યાર્થી નેતા ઉમર ખાલિદને રાજસ્થાનથી રાજ્યસભા ઉમેદવાર તરીકે નોમિનેટ કરવામાં આવે. રાશિદે કહ્યું કે રાજસ્થાનના મુસ્લિમોનું દાયકાઓથી સંસદમાં કોઈ પ્રતિનિધિત્વ નથી, ન તો લોકસભામાં કે ન તો રાજ્યસભામાં. તેમણે કહ્યું, “છેલ્લી લોકસભા ચૂંટણીમાં, ભાજપે ૨૫ ઉમેદવારો ઉભા રાખ્યા હતા અને કોંગ્રેસે ૨૫, પરંતુ એક પણ મુસ્લિમ ઉમેદવાર નહોતો. તે સમયે, રાજસ્થાનના મુસ્લિમોને આશા હતી કે આગામી રાજ્યસભા ચૂંટણીમાં ઓછામાં ઓછો એક મુસ્લિમ મોકલવામાં આવશે.”
રાશિદે ઉમર ખાલિદનો બચાવ કરતા કહ્યું કે ભારતીય બંધારણ મુજબ, કોઈ વ્યક્તિને કાયદાની અદાલતમાં દોષિત સાબિત ન થાય ત્યાં સુધી દોષિત માનવામાં આવતો નથી. અનેક નેતાઓના ઉદાહરણો આપતા તેમણે છદ્ગૈં ને કહ્યું, “ઉમર ખાલિદ સામે આરોપો છે, પરંતુ આરોપી બનવું અને દોષિત સાબિત થવું એ બે અલગ અલગ બાબતો છે. ઉત્તર પ્રદેશના મુખ્યમંત્રી યોગી આદિત્યનાથ, કુલદીપ સિંહ સેંગર, ચિન્મયાનંદ અને અનુરાગ ઠાકુર પર પણ આરોપ મૂકવામાં આવ્યા હતા, છતાં તેઓ ચૂંટણી લડ્યા અને લોકસભા, રાજ્યસભા અને વિધાનસભામાં પહોંચ્યા.”
રાશિદે વધુમાં કહ્યું કે ઉમર ખાલિદ એક શિક્ષિત યુવા નેતા છે અને તેમણે દરેક મહત્વપૂર્ણ મુસ્લિમ મુદ્દા પર પોતાનો અવાજ ઉઠાવ્યો છે. તેમણે કહ્યું, “અમે માંગ કરીએ છીએ કે કોંગ્રેસ પાર્ટી તેમને ઉમેદવાર બનાવે. જેમ કોંગ્રેસ પાર્ટીએ કન્હૈયા કુમાર અને અન્ય યુવાનોને મુખ્ય પ્રવાહમાં લાવવાનું કામ કર્યું હતું, તેવી જ રીતે પાયાના સ્તરે સંઘર્ષ કરનારાઓને પણ મુખ્ય પ્રવાહમાં લાવવા જોઈએ. જો રાજસ્થાનમાંથી મુસ્લિમ પ્રતિનિધિત્વની જરૂર હોય, તો ઉમર ખાલિદ જેવા શિક્ષિત વ્યક્તિને કેમ ન પસંદ કરવામાં આવે?” મોહસીને કહ્યું કે કોંગ્રેસ પાર્ટી પોતે માને છે કે ફક્ત આરોપોના કારણે કોઈને પણ સમાજમાંથી બહિષ્કૃત ન કરવા જોઈએ.
રાશિદે એ પણ નિર્દેશ કર્યો કે ઘણા વરિષ્ઠ કોંગ્રેસી નેતાઓ ભાજપમાં જોડાઈ રહ્યા છે, અને તાજેતરમાં કેટલાક કોંગ્રેસના ધારાસભ્યોએ પણ ભાજપની તરફેણમાં મતદાન કર્યું હતું, પરંતુ ઉમર ખાલિદ સાથે આવું થવાની કોઈ શક્યતા નથી. તેમણે કહ્યું, “ઉમર ખાલિદ એક એવા ઉમેદવાર છે જે રાજ્યસભામાં જશે અને જમીની મુદ્દાઓ, ખાસ કરીને મુસ્લિમોને લગતા મુદ્દાઓ, ભય કે લાલચ વિના ઉઠાવશે. તેમને ભાજપ દ્વારા ડરાવવામાં આવશે નહીં અને ખરીદવામાં આવશે નહીં. આ અમારી માંગણીનો મુખ્ય આધાર છે.” મોહસીન રશીદે કહ્યું કે આ માંગણી ફક્ત તેમની વ્યક્તિગત નથી, પરંતુ સમગ્ર રાજસ્થાનના મુસ્લિમોની છે.
રાશિદે કહ્યું કે તેઓ કોંગ્રેસમાં કોઈ સત્તાવાર પદ ધરાવતા નથી અને રાજસ્થાન મુસ્લિમ ગઠબંધનના રાજ્ય પ્રભારી અને પ્રમુખ છે. તેમણે કહ્યું, “આ સમગ્ર રાજસ્થાનના મુસ્લિમ સમુદાયની માંગ છે. અમે કોંગ્રેસને મત આપીએ છીએ. અમારા પર હુમલા છતાં અમે કોંગ્રેસને ટેકો આપીએ છીએ. તેથી, અમે ઇચ્છીએ છીએ કે કોંગ્રેસ આ માંગણીને હકારાત્મક રીતે ધ્યાનમાં લે, તેને મુસ્લિમ સમુદાયની કાયદેસર માંગ ગણે.” તમને જણાવી દઈએ કે દિલ્હી રમખાણોના કેસમાં ઉમર ખાલિદ ૨૦૨૦ થી જેલમાં છે.
