પિતા-પુત્રીના પવિત્ર સંબંધને કલંકિત કર્યા. માતાની ફરિયાદ બાદ ગણતરીના કલાકોમાં નરાધમ પિતાની ધરપકડ
Surat, તા.૫
નવસારી જિલ્લાના ગણદેવી તાલુકામાં પિતા-પુત્રીના પવિત્ર સંબંધને કલંકિત કરતી ચોંકાવનારી ઘટના સામે આવી છે. દક્ષિણ આફ્રિકાથી પરત ફરેલા એક પિતાએ પોતાની જ ૧૪ વર્ષની સગીર પુત્રી પર વારંવાર દુષ્કર્મ આચર્યું હોવાની ફરિયાદ નોંધાતા પોલીસે આરોપીની ગણતરીના કલાકોમાં ધરપકડ કરી જેલ હવાલે કર્યો છે.પીડિતાની માતાના જણાવ્યા મુજબ, તેમના પતિ વર્ષ ૨૦૧૯માં દક્ષિણ આફ્રિકા ગયા હતા અને વર્ષ ૨૦૨૪માં પરત આવ્યા બાદ સતત સગીર દીકરી સાથે છેડતી કરતા હતા. ગત મે મહિનાની ૯, ૧૦ અને ૧૧ તારીખે જ્યારે માતા નોકરી પર ગઈ હતી ત્યારે આરોપીએ ઘરમાં એકલી રહેલી દીકરીની મરજી વિરુદ્ધ સતત ત્રણ દિવસ સુધી દુષ્કર્મ આચર્યું હતું. ઘટનાને છુપાવવા માટે તેણે દીકરીને ગર્ભનિરોધક ગોળીઓ પણ આપી હતી તેમજ કોઈને જાણ કરશે તો જાનથી મારી નાખવાની ધમકી આપી હતી.ડરના કારણે દીકરી લાંબા સમય સુધી મૌન રહી હતી, પરંતુ ગત ૩૦મી તારીખે તેણે માતાને સમગ્ર હકીકત જણાવી હતી. ત્યારબાદ માતાએ તાત્કાલિક ગણદેવી પોલીસ મથકે ફરિયાદ નોંધાવતા પોલીસે દુષ્કર્મ અને પોક્સોની વિવિધ કલમો હેઠળ ગુનો નોંધી કાર્યવાહી હાથ ધરી હતી. ગુનો નોંધાયા બાદ ભાગી છૂટેલા આરોપીને પોલીસે ઝડપથી શોધી કાઢી ધરપકડ કરી હતી. ડીવાયએસપી ભગીરથસિંહ ગોહિલે જણાવ્યું હતું કે આરોપીની કાયદેસર ધરપકડ કરીને રિમાન્ડ મેળવવામાં આવ્યા છે અને હાલ તે જેલ હવાલે છે. એફએસએલ તથા ડીએનએ સેમ્પલના મેચિંગ સહિતની તપાસ પ્રક્રિયા ચાલુ છે. પીડિતાની માતાએ આરોપીને કડકમાં કડક સજા આપવા તેમજ કેસની ફાસ્ટ ટ્રેક કોર્ટમાં સુનાવણી કરવાની માંગ કરી છે.
