Washington,તા.૯
યુએસ પ્રમુખ ડોનાલ્ડ ટ્રમ્પે ફરી એકવાર રશિયા-યુક્રેન યુદ્ધ સમાપ્ત કરવાની ઇચ્છા જાહેરમાં વ્યક્ત કરી છે. વ્હાઇટ હાઉસ ખાતે મીડિયા સાથે વાત કરતા ટ્રમ્પે કહ્યું કે તેમણે વિશ્વભરમાં ઘણા યુદ્ધો બંધ કર્યા છે, પરંતુ તેમની સૌથી મોટી ઇચ્છા રશિયા-યુક્રેન યુદ્ધ સમાપ્ત કરવાની છે. તેમણે વધુમાં જણાવ્યું હતું કે જો આ યુદ્ધ સમાપ્ત થાય છે, તો તે તેમના માટે એક મોટો શાંતિ કરાર હશે.
ડોનાલ્ડ ટ્રમ્પે કહ્યું, “હું આ યુદ્ધનો અંત જોવા માંગુ છું. રશિયા અને યુક્રેન વચ્ચે શાંતિ સ્થાપિત થવી જોઈએ. જો લોકો મરવાનું બંધ કરે તો તે સારું રહેશે.” તેમણે એવો પણ દાવો કર્યો હતો કે રશિયા અને યુક્રેન વચ્ચે ચાલી રહેલ સંઘર્ષ બીજા વિશ્વયુદ્ધ પછીનો સૌથી ખરાબ યુદ્ધ બની ગયો છે, જેમાં દર મહિને હજારો લોકો જીવ ગુમાવે છે.
આ દરમિયાન, ડોનાલ્ડ ટ્રમ્પે ૯ થી ૧૧ મે સુધી રશિયા અને યુક્રેન વચ્ચે ૩ દિવસના યુદ્ધવિરામની પણ જાહેરાત કરી છે. આ યુદ્ધવિરામ રશિયાના વિજય દિવસની ઉજવણી દરમિયાન અમલમાં રહેશે. ડોનાલ્ડ ટ્રમ્પે સોશિયલ મીડિયા પ્લેટફોર્મ ટ્રૂથ સોશિયલ પર લખ્યું છે કે આ સમયગાળા દરમિયાન રશિયા અને યુક્રેન વચ્ચેની બધી લશ્કરી પ્રવૃત્તિઓ બંધ કરવામાં આવશે.
તેમણે વધુમાં જણાવ્યું હતું કે આ યુદ્ધવિરામ તેમના દ્વારા શરૂ કરવામાં આવ્યો હતો. યુક્રેનના રાષ્ટ્રપતિ વોલોડીમીર ઝેલેન્સકી અને રશિયન રાષ્ટ્રપતિ વ્લાદિમીર પુતિન બંનેએ આ સ્વીકાર્યું છે. ડોનાલ્ડ ટ્રમ્પે એમ પણ કહ્યું હતું કે આ સોદા હેઠળ, બંને દેશો ૧,૦૦૦ કેદીઓની આપ-લે કરશે.
ડોનાલ્ડ ટ્રમ્પને આશા છે કે આ કામચલાઉ યુદ્ધવિરામ આ લોહિયાળ યુદ્ધના અંતની શરૂઆત તરીકે ચિહ્નિત કરી શકે છે. તેમણે એમ પણ કહ્યું કે કાયમી શાંતિ માટે વાટાઘાટો ચાલી રહી છે. બંને પક્ષો એક કરાર તરફ આગળ વધી રહ્યા છે.
