Surat, તા.૯
ડાયમંડ સિટી સુરતમાં ગુનાખોરીના ગ્રાફમાં સતત વધારો થતો જોવા મળી રહ્યો છે. આ દરમિયાન શહેરના પુણા વિસ્તારમાં એક ચોંકાવનારી ઘટના સામે આવી છે, જેમાં સામાન્ય વાતમાં થયેલી તકરાર હત્યામાં પરિણમી છે. પુણા ગામમાં આવેલા ઓમ શાંતિ ભવન સ્થિત સાડીના એક કારખાનામાં કામ કરતા બે શ્રમિકો વચ્ચે થયેલી બોલાચાલીએ લોહિયાળ વળાંક લીધો હતો, જેમાં એક ૩૯ વર્ષીય વ્યક્તિએ પોતાનો જીવ ગુમાવ્યો છે.?
મળતી માહિતી મુજબ, પુણા ગામના ઓમ શાંતિ ભવનમાં સાડીના બે કારખાના આવેલા છે. આ કારખાનામાં પશ્ચિમ બંગાળના વતની એવા બે શ્રમિકો કામ કરતા હતા. મૃતકનું નામ ચાંદ સાલેહાર બીબી (ઉં.વ. ૩૯) છે, જ્યારે આરોપીની ઓળખ મુસા સલામભાઈ શેખ (ઉં.વ.૨૦) તરીકે થઈ છે. પોલીસ તપાસમાં બહાર આવ્યું કે, બંને શ્રમિકો મૂળ પશ્ચિમ બંગાળના હોવાથી એકબીજાને સારી રીતે ઓળખતા હતા.
ઘટનાના દિવસે, કોઈ યુવતીને મેસેજ કરવા બાબતે બંને વચ્ચે સામાન્ય મજાક અને ખેંચતાણ શરૂ થઈ હતી. આ મજાક ધીમે-ધીમે ઉગ્ર રૂપ ધારણ કરી ગઈ અને બંને વચ્ચે બોલાચાલી શરૂ થઈ ગઈ હતી. જેથી મજાક-મજાકમાં આરોપી મુસા શેખ વધુ પડતો ગુસ્સે થઈ ગયો અને પોતાનો આપો ગુમાવી બેઠો અને કારખાનામાં સાડીના કામ માટે વપરાતી તીક્ષ્ણ કાતર ઉઠાવી તેણે ચાંદ સાલેહાર બીબી પર હુમલો કરી દીધો હતો. મુસાએ મૃતકની પીઠના ભાગે કાતરના ત્રણથી ચાર ઉપરાછાપરી ઘા ઝીંકી દીધા હતા. હુમલો એટલો ગંભીર હતો કે, ચાંદ સાલેહાર બીબી લોહીલુહાણ થઈ સ્થળ પર જ ઢળી પડ્યો અને તેનું કરુણ મોત નીપજ્યું હતું.?
ઘટનાની જાણ થતા જ પુણા પોલીસનો કાફલો ઘટનાસ્થળે દોડી ગયો હતો. પોલીસે સ્થળ પર પહોંચી પંચનામું કરી મૃતદેહને પોસ્ટમોર્ટમ અર્થે સિવિલ હોસ્પિટલ ખસેડ્યો હતો અને ગણતરીના કલાકોમાં જ આરોપી મુસા શેખની ધરપકડ કરી લીધી હતી.? પોલીસ અધિકારીએ જણાવ્યું હતું કે, “આરોપી મુસાને પણ ઝપાઝપી દરમિયાન સામાન્ય ઈજાઓ પહોંચી હોવાથી તેને સારવાર માટે સિવિલ હોસ્પિટલ લઈ જવામાં આવ્યો હતો. હાલ પોલીસ દ્વારા આરોપીની કડક પૂછપરછ કરવામાં આવી રહી છે અને તેની સામે હત્યાનો ગુનો નોંધી આગળની કાયદેસરની કાર્યવાહી હાથ ધરવામાં આવી છે.”?
ભરચક રહેણાંક અને વ્યાપારી વિસ્તારમાં બનેલી આ ઘટનાને પગલે સ્થાનિક રહીશો અને અન્ય શ્રમિકોમાં ફફડાટ વ્યાપી ગયો છે. સામાન્ય રીતે શાંત ગણાતા આ વિસ્તારમાં નજીવી બાબતે થયેલી હત્યાએ સુરક્ષા વ્યવસ્થા પર પણ સવાલો ઉભા કર્યા છે. ખાસ કરીને પરપ્રાંતિય શ્રમિકોમાં વધતી જતી આક્રમકતા અને આવેશમાં આવીને કરવામાં આવતા ગુનાઓ પોલીસ માટે ચિંતાનો વિષય બન્યા છે.
