Gandhinagar,તા.06
ગાંધીનગરના માર્ગો ઉપર રોયલ્ટીપાસ વગર-ઓવરલોડેડ રેતી-ખનીજ ભરીને ગેરકયાદેરીતે હેરાફેરી કરતા ડમ્પર સામે જિલ્લા ભુસ્તર તંત્ર દ્વારા લાલ આંખ કરવામાં આવી છે. છેલ્લા ત્રણ દિવસ દરમ્યાન જિલ્લાના વિવિધ માર્ગો અને પોઇન્ટ ઉપર ચેકીંગ દરમ્યાન છ ડમ્પર બિનઅધિકૃતરીતે રેતી-સિલીકા સેન્ડની હેરાફેરી કરતા પકડી પાડવામાં આવ્યા છે અને કુલ ૧.૫૦ કરોડના મુદ્દામાલ પણ જપ્ત કરવામાં આવ્યો છે.
ગાંધીનગર જિલ્લાની સાબરમતી સહિત અન્ય નદીઓમાં ગેરકાયદે રેતીખનનની પ્રવૃત્તી વધી રહી છે તો બીજીબાજુ કલેક્ટરના આદેશને પગલે જિલ્લા ભુસ્તર તંત્ર દ્વારા ચેકીંગ પણ વધારી દેવામાં આવ્યું છે અને બિનઅધિકૃતરીતે રેતીની હેરાફેરી કરતા તત્વો સામે લાલઆંખ કરવામાં આવી છે. જિલ્લાના મદદનીશ ભુસ્તરશાસ્ત્રી પ્રવણ સિંહની જિલ્લાકક્ષાની ટીમ દ્વારા છેલ્લા ત્રણ દિવસોમાં વાહન ચેકીંગની કામગીરી અલગ-અલગ વિસ્તારમાં હાથ ધરી સાદીરેતી અને સિલીકા સેન્ડ ખનિજના બિનઅધિકૃત વહન કરતાં કુલ છ વાહનો જપ્ત કરવામાં આવ્યા છે. છ વાહનોમાં કુલ ૮૮.૨૨ મેટ્રીક ટન ખનિજના સાથે આશરે કુલ ૧.૫૦ કરોડનો મુદ્દામાલ જપ્ત કરવામાં આવ્યો છે.
એટલુ જ નહીં, જપ્ત કરેલા વાહનોના વાહનમાલિકો વિરૃધ્ધ ગુજરાત મિનરલ (પ્રિવેન્શન ઓફ ઇલ્લીગલ માઇનીંગ, ટ્રાન્સપોર્ટેશન અને સ્ટોરેજ) નિયમો હેઠળ દંડકીય કાર્યવાહી હાથ ધરવામાં પણ આવનાર છે.ઉલ્લેખનીય છે કે, ભુસ્તર તંત્ર દ્વારા હવે તો ચાલુ દિવસે જ નહીં પણ રજાના દિવસે પણ માર્ગો ઉપર ચેકીંગની કામગીરી હાથ ધરવામાં આવી રહી છે અને ગેરકાયદે રેતીની હેરાફેરી કરતા તત્વો સામે દંડનીય કાર્યવાહી વધુ સઘન બનાવવામાં આવી છે.
