Morbi શહેર અને જીલ્લો પાણી પાણી, ૧૮ રોડ રસ્તા બંધ થયા
(રવિ મોટવાણી દ્વારા)
Morbi તા.૧
મોરબી શહેર અને જીલ્લામાં શનિવારે વહેલી સવારે ૪ વાગ્યાથી મેઘરાજાની શાહી સવારી આવી પહોંચી હતી સતત ધોધમાર વરસાદ મોરબી જીલ્લામાં વરસ્યો હતો મોરબી તાલુકામાં ૧૨ કલાકમાં ધોધમાર પોણા દશ ઇંચ જેટલો વરસાદ ખાબક્યો હતો તો ટંકારા તાલુકામાં ૭ ઇંચ, હળવદ તાલુકામાં ૬.૫ ઇંચ ઉપરાંત માળિયા તાલુકામાં પોણા પાંચ ઇંચ અને સૌથી ઓછો વાંકાનેર તાલુકામાં ૩ ઈંચથી વધુ વરસાદ વરસ્યો હતો
મોરબી જીલ્લામાં શનિવારે વહેલી સવારથી વરસાદને પગલે અગાઉથી ભરાઈ ગયેલા મચ્છુ ૨ અને મચ્છુ ૩ ડેમના દરવાજા ખોલવામાં આવ્યા હતા જેથી મચ્છુ નદી બે કાંઠે વહેતી જોવા મળી હતી સવારથી ડેમના દરવાજા ખોલવામાં આવ્યા બાદ ક્રમશ દરવાજાની સંખ્યા સતત વધારવાની ફરજ પડી હતી મચ્છુ ૨ ડેમના ૧૬ દરવાજા ૧૦ ફૂટ ખોલી એક લાખ કયુસેકથી વધુ પાણી નદીમાં છોડવામાં આવ્યું હતું અને મચ્છુ નદીનો ભવ્ય નજારો જોવા મળ્યો હતો
મચ્છુ ૨ ડેમના ૧૬ દરવાજા ૧૦ ફૂટ ખોલવામાં આવ્યા, ૧ લાખ કયુસેક પાણી છોડાયું
મોરબીની જીવાદોરી સમાન મચ્છુ ૨ ડેમ ગત સપ્તાહે પડેલા વરસાદમાં જ ભરાઈ ગયો હતો અને શનિવારે વહેલી સવારથી સતત વરસાદને પગલે ડેમના ૪ દરવાજા સવારે ખોલવામાં આવ્યા બાદ સતત દરવાજામાં વધારો કરવામાં આવ્યો હતો અને બપોરે ૩ વાગ્યા બાદ ડેમના ૧૬ દરવાજા ૧૦ ફૂટે ખોલવામાં આવ્યા હતા અને ૧ લાખ કયુસેકથી વધુ પાણી નદીમાં છોડવામાં આવી રહ્યું હતું જેથી બે તાલુકાના ૩૨ ગામોને એલર્ટ જાહેર કરવામાં આવ્યું હતું
મચ્છુ ૩ ડેમના ૧૩ દરવાજા ૧૦૦ ફૂટ ખોલવામાં આવ્યા, ૧ લાખ કયુસેક પાણી છોડયું
મચ્છુ ૨ ડેમમાંથી સતત પાણી છોડવાને પગલે મચ્છુ ૩ ડેમમાં પણ પાણીની આવક થતા ડેમના દરવાજા સવારથી ખોલવામાં આવ્યા હતા સવારે એક દરવાજો ખોલ્યા બાદ ક્રમશ વધારો કરી બપોરે ૪ વાગ્યા બાદ ડેમના ૧૩ દરવાજા ૧૦ ફૂટ ખોલવામાં આવ્યા હતા ૧ લાખથી વધુ કયુસેક ઇન્ફ્લો સામે ૧ લાખથી વધુ કયુસેક આઉટફલો જાળવી રાખવામાં આવ્યું હતું
બ્રાહ્મણી ૧ ડેમ ડેમ સંપૂર્ણ ભરાઈ જતા ૧૫ ગામોને એલર્ટ જાહેર
હળવદના ગોલાસણ પાસે આવેલ બ્રાહ્મણી ૧ ડેમ ૧૦૦ ટકા ભરાઈ ગયો હતો જેથી સાંજે ૫ વાગ્યે ડેમનો દરવાજો ખોલવાની ફરજ પડી હતી જેથી હળવદ તાલુકાના ૧૫ ગામોને એલર્ટ જાહેર કરવામાં આવ્યું હતું
પંચાયત વિભાગના ૧૬ અને સ્ટેટ વિભાગના ૦૨ રોડ બંધ, ટીમ સ્ટેન્ડ ટૂ મોડમાં
મોરબી જીલ્લામાં ભારે વરસાદને પગલે જીલ્લા કલેકટર સ્વપનીલ ખરે દ્વારા પત્રકાર પરિષદ કરી માહિતી આપવામાં આવી હતી કે એક ટીમ સ્ટેન્ડ ટૂ મોડમાં છે અને જરૂરત પડ્યે વધુ ટીમોની મદદ લેવામાં આવશે મોરબી જીલ્લામાં પંચાયત વિભાગના ૧૬ અને સ્ટેટ વિભાગના ૦૨ મળીને કુલ ૧૮ રોડ ભારે વરસાદ, ઝાડ પડી જવાને કારણે બંધ થયા હતા તે ઉપરાંત કલેકટરે મચ્છુ ૩ ડેમ, સાદુળકા ગામે આશ્રયસ્થાન અને બેઠા પુલ સહિતના સ્થળોની જાતે મુલાકાત લઈને સ્થિતિનો તાગ મેળવ્યો હતો
મોરબીનો બેઠો પુલ બંધ, શનાળા-રવાપર રોડ પાણી પાણી
મોરબી મચ્છુ નદી બે કાંઠે વહેવા લાગતા તકેદારીના ભાગરૂપે મચ્છુ નદી પરનો બેઠો પુલ બંધ કરવામાં આવ્યો હતો તે ઉપરાંત શહેરનો શનાળા રોડ, રવાપર રોડ, સાવસર પ્લોટ સહિતના મેઈન રોડ રસ્તા પર વાહન ના ચાલી સકે તેટલા પાણી ભરાઈ ગયા હતા તો મોરબી મહાપાલિકા કચેરીના ગ્રાઉન્ડમાં પાણી ભરાઈ ગયું હતું એટલું જ નહિ મોરબીનું જુનું બસ સ્ટેશન તળાવમાં ફેરવાઈ ગયું હતું તે ઉપરાંત જીકીયાલી કોઝવે અને રવાપર નદીના રોડ બંધ કરવાની ફરજ પડી હતી
