Rajkot તા.૨૯ઃ
Rajkot નાગરિક સહકારી બેંક લિ.ની ૭૩મી વાર્ષિક સાધારણ સભા બેંકની હેડ ઓફિસ, અરવિંદભાઇ મણીઆર નાગરિક સેવાલય, રાજકોટ ખાતે યોજાઇ હતી અને તેમાં વિશાળ સંખ્યામાં ડેલિગેટ્સ ઉપસ્થિત રહ્યાં હતાં.
બેંકના ચેરમેન દિનેશભાઇ પાઠકે પ્રાસંગિકમાં જણાવ્યું હતું કે, ગીતની પંક્તિ, હમ વિજય કી ઓર બઢતે જા રહે હૈં, આ ભાવ મનમાં છે તેનું પ્રગટીકરણ ગીતના માધ્યમથી થયું છે.અત્યારે બેંકની પ્રગતિના આંકડા રજુ થયા તે દર્શાવે છે કે હમ વિજય કી ઓર બઢતે જા રહે હૈં. ૧૮ ટકા ડિવિડન્ડ મંજૂર થયું છે. આપણે ગત વર્ષની આંકડાકીય માહિતી જોઇ. તેની સામે આ વર્ષના તા. ૨૩-૯-૨૦૨૬ સુધીના આંકડા જોઇએ તો, બિઝનેસ મિક્સ રૂા. ૧૨,૩૮૭ કરોડ, તેમાં રૂા. ૭,૨૧૧ કરોડની ડિપોઝીટ, રૂા. ૫,૧૭૬ કરોડનું ધિરાણ છે.
નફો રૂા. ૭૩ કરોડ નોંધાયેલ છે અને મને આશા છે કે આ વર્ષના અંતે આપણી બેંક રૂા. ૧૫૦ કરોડનો પ્રોફીટ કરશે. બેંકના ઇતિહાસમાં સર્વપ્રથમ વખત જ એક વર્ષમાં બિઝનેસમાં રૂા. ૧,૨૪૦ કરોડનો વધારો થયો છે.
આ ઐતિહાસિક સિદ્ધિ છે. આપ સહુએ આપણી બેંકની કામગીરી ઉપર મૂકેલા વિશ્વાસનું આ પરિણામ છે. આને હું બિરદાવું છું. એટલે જ કહેવાય છે કે સિદ્ધ થવું હોય તો સહન પણ કરવું પડે અને એ જ વિજય પ્રાપ્ત કરે છે. આપણે કરેલા સત્કર્મોને લીધે આપણી બેંક પ્રગતિ કરી રહી છે. સત્કર્મનો એક અન્ય ભાગ જોઇએ તો, સામાજિક ઉત્તરદાયિત્ત્વનાં કાર્યો. તાજેતરની એક ઘટના જોઇએ તો, જૈન ગુરૂદેવ શ્રી નમ્રમુનિના જન્મદિનના અવસરે અર્હમ સેવા ગ્રુપ દ્વારા રિક્ષા માટે લોન આપવામાં આવે છે. તેઓ આપણી બેંક પાસે તા. ૧૬ના આવ્યા. બેંકની રૈયા રોડ શાખાએ ત્વરિત કામગીરી કરી આ તમામ લોન મંજૂર કરી. આ માટે તેઓ અભિનંદને પાત્ર છે. જે બ્રાન્ચ લેવલે કામ કરે છે .
તેઓ આપણી બ્રાન્ડ ઉભી કરે છે. બીજું, સભાસદ પરિવારજનોને કેન્સર અને કીડની જેવી બીમારીમાં આર્થિક સહાય કરીએ છીએ. સભાસદોના લાભાર્થે લેબોરેટરીમાં નિદાન માટે રૂા. ૮૮ લાખ ૯૩ હજારની સહાય કરી છે. સભાસદ માટે અકસ્માત વીમો લીધેલ છે. તેમાં ગત વર્ષે આકસ્મિક મૃત્યુ પામેલ સભાસદોના પરિવારજનોને રૂા. ૨૪ લાખનો આર્થિક સધિયારો આપ્યો.
અત્યાર સુધીમાં સભાસદોને આકસ્મિક અવસાનના કિસ્સામાં રૂા. ૩ કરોડ ૪૯ લાખની આર્થિક સહાય કરી. આવી જ રીતે, સભાસદોના સંતાનોને શૈક્ષણિક પુરસ્કાર અને સ્કોલરશીપ આપીએ છીએ. શહેરના સૌંદર્યીકરણ માટે યોગદાન આપેલું છે. છેલ્લા ૨૮ વર્ષથી ૪ થી ૧૬ વર્ષના બાળકો માટે નિશુલ્ક ક્રિકેટ કોચિંદ કેમ્પનું આયોજન કરીએ છીએ. સમાજ પાસેથી મેળવેલું સમાજને પરત આપીએ છીએ. આ બધા જ કાર્યોથી ફરીથી કહીશ કે હમ વિજય કી ઓર બઢતે જા રહે હૈં.
બેંકના સીઇઓ અને જનરલ મેનેજર શ્રી વિનોદ શર્માએ જણાવ્યું હતું કે, નાણાકીય વર્ષ ૨૦૨૫-૨૦૨૬ની આંકડાકીય માહિતીમાં, ડિપોઝીટ રૂા. ૬૯૦ કરોડના વધારા સાથે રૂા. ૭,૧૩૩ કરોડ, ધિરાણમાં રૂા. ૫૫૦ કરોડના વધારા સાથે રૂા. ૪,૭૬૪ કરોડ અને કુલ બિઝનેસમાં રૂા. ૧,૨૪૦ કરોડની વૃદ્ધિ સાથે રૂા. ૧૧,૮૯૭ કરોડ, ઓપરેટીંગ નફો રૂા. ૧૧૫.૯૯ કરોડ નોંધાયો. કુલ સ્વભંડોળ રૂા. ૧,૦૬૧.૫૪ કરોડ છે. રિઝર્વ બેંક ઓફ ઇંડિયાના નિયમ મુજબ સીઆરએઆર ૧૨ ટકા હોવો જોઇએ, તેને બદલે ખૂબ જ સારી સ્થિતિમાં એટલે કે ૧૭.૭૨ ટકા છે.
સિંગલ બોરોઅર લિમિટ રૂા. ૧૨૬.૮૯ કરોડ અને ગ્રુપ બોરોઅર લિમિટ રૂા. ૨૧૧.૪૮ કરોડ છે. સતત છ વર્ષથી નેટ એનપીએ ઝીરો છે. નાનાં ધિરાણો મિનિમમ ૫૦ ટકા હોવા જોઇએ તેને બદલે આપણે ૮૬ ટકા છે. સભાસદોની સંખ્યા ૩,૬૧,૭૬૭ છે. સીડી રેશિયો ૬૫ ટકા હોવો જોઇએ તેને બદલે ૬૭ ટકા છે. યુપીઆઇ વ્યવહાર રૂા. ૯,૭૭૩ કરોડ અર્થાત ગત વર્ષ કરતાં ૨૭.૭૯ ટકાનો વધારો જોવા મળ્યો છે.આભાર દર્શન સીએ. શ્રી ચંદ્રેશભાઇ ધોળકિયાએ ર્ક્યું હતું. સરળ અને સફળ સંચાલન શ્રી રજનીકાંત રાયચુરાએ ર્ક્યું હતું.
