Rajkot: નાકરાવાડી ડમ્પિંગ યાર્ડ પાસે કચરાના ઢગલામાંથી મળ્યું ભ્રૂણ

રાહદારીએ પ્લાસ્ટિકની કોથળીમાં ભ્રૂણ જોતા પોલીસને કરી જાણ; કુવાડવા પોલીસે સીસીટીવીના આધારે તપાસ શરૂ કરી

Rajkot,તા.09

શહેરના છેવાડે આવેલા નાકરાવાડી ડમ્પિંગ યાર્ડ પાસે માનવતાને શરમાવે તેવી એક ઘટના પ્રકાશમાં આવી છે. કોઈ અજાણી મહિલાએ અધૂરા માસે જન્મેલા ભ્રૂણને પ્લાસ્ટિકની કોથળીમાં ભરી કચરામાં ફેંકી દેતા સમગ્ર વિસ્તારમાં ચકચાર મચી ગઈ છે.પ્રાપ્ત વિગતો મુજબ, છેવાડે આવેલા નાકરાવાડી ડમ્પિંગ યાર્ડ પાસેથી પસાર થતા એક રાહદારીની નજર રોડ પર પડેલા એક શંકાસ્પદ પ્લાસ્ટિકના કોથળા પર પડી હતી. કુતૂહલવશ નજીક જઈને જોતા તેમાં નવજાત ભ્રૂણ જોવા મળ્યું હતું. આ દ્રશ્ય જોઈ રાહદારીએ તુરંત પોલીસ કંટ્રોલ રૂમને જાણ કરી હતી.ઘટનાની ગંભીરતા જોતા કુવાડવા પોલીસ મથકનો કાફલો તાત્કાલિક ઘટનાસ્થળે દોડી ગયો હતો. પોલીસે તકેદારીના ભાગરૂપે 108 એમ્બ્યુલન્સને પણ બોલાવી હતી, જ્યાં પેરામેડિકલ સ્ટાફે ભ્રૂણને મૃત જાહેર કર્યું હતું. પોલીસે પ્રાથમિક પંચનામું કરી ભ્રૂણના મૃતદેહને ફોરેન્સિક પોસ્ટમોર્ટમ માટે રાજકોટ સિવિલ હોસ્પિટલ ખાતે ખસેડ્યો છે. પોલીસ સૂત્રોના જણાવ્યા અનુસાર, આસપાસના વિસ્તારોના સીસીટીવી ફૂટેજ તપાસવામાં આવી રહ્યા છે. સ્થાનિક હોસ્પિટલો અને પ્રસૂતિગૃહોના છેલ્લા કેટલાક દિવસોના રેકોર્ડ્સની ચકાસણી શરૂ કરવામાં આવી છે. કોઈ અજાણી મહિલાએ અનૈતિક સંબંધો અથવા અન્ય કોઈ કારણસર આ કૃત્ય કર્યું હોવાની આશંકા સાથે તપાસ તેજ કરવામાં આવી છે.

શહેરમાં અગાઉ પણ ત્યજી દેવાયેલા નવજાત શિશુઓ મળી આવવાની ઘટનાઓ બની છે. કેટલીક ઘટનાઓમાં માસૂમ જીવિત મળી આવે છે, તો ક્યાંક કરૂણ મોત થાય છે. હાલમાં કુવાડવા પોલીસે અજાણી મહિલા વિરુદ્ધ ગુનો નોંધી તેને ઝડપી પાડવા ચક્રો ગતિમાન કર્યા છે.