Rajkot: ભગવાન પરશુરામ જન્મોત્સવ સમિતિ દ્વારા પરશુરામ જન્મોત્સવની છ દિવસીય ઉજવણી

આરતી, પ્રસાદ, સ્પર્ધા, સાંસ્કૃતિક કાર્યક્રમોની વણઝાર
Rajkot, તા.૧૩
ભગવાન પરશુરામ જન્મોત્સવ સમિતિના આયોજકોએ જણાવ્યું હતું કે, ભગવાન પરશુરામજીનો જન્મોત્સવ એટલે અક્ષય તૃતીયા-અખાત્રીજ તા.૧૯ ને રવિવારના રોજ છે ત્યારે ભગવાન પરશુરામ જન્મોત્સવ સમિતિ દ્વારા છેલ્લા ઘણા વર્ષોથી શહેરના ત્રિકોણબાગ ખાતે ભગવાન પરશુરામજીનુ સ્થાપન કરી દરરોજ રાત્રે ૮ કલાકે આરતી સહિતના કાર્યક્રમોનુ આયોજન કરવામાં આવે છે ત્યારે આ વર્ષે પણ જય જય પરશુરામના નારા સાથે તા.૧૩ ને સોમવારના રોજ સાંજે ૬ કલાકે ભગવાન પરશુરામજીનુ સ્થાપન કરવામાં આવશે. તેમજ તા.૧૩ થી ૧૯ એપ્રિલ સુધી ત્રિકોણબાગ ખાતે ભગવાન પરશુરામજીના પંડાલમાં દરરોજ રાત્રે ૮ કલાકે મહાઆરતીના કાર્યક્રમમાં શહેરના તમામ શ્રેણીના ભૂદેવો એટલે કે રાજકીય તેમજ સામાજિક અને તમામ તડગોળના આગેવાનોના હસ્તે ભગવાન પરશુરામજીની આરતી ઉતારવામાં આવશે. તેમજ દરરોજ રાત્રે સાંસ્કૃતિક કાર્યક્રમો યોજશે જેમાં ભગવાન પરશુરામજીની ગાથા, બહેનો દ્વારા રંગોળી સ્પર્ધા, ભગવાન સત્યનારાયણની કથા, સંગીત સ્પર્ધા, વેશભૂષા, શ્રીનાથજીની ઝાંખી, છપ્પન ભોગ અને લોકડાયરાની કાર્યક્રમ યોજાશે તા.૧૯ એપ્રિલના ભગવાન પરશુરામજીની જયંતિના દિવસે ભગવાન પરશુરામ જન્મોત્સવ સમિતિ દ્વારા શોભાયાત્રા સાંજે ૫ કલાકે શહેરના પંચનાથ મંદિર ખાતેથી નીકળી શહેરના વિવિધ માર્ગો ઉપર ફરી પરશુરામધામ ખાતે જશે ત્યાં મહાઆરતી તેમજ પ્રસાદના કાર્યક્રમ યોજાશે.