Rajkot, તા.23
સૌરાષ્ટ્ર યુનિ.ના વર્ષ 2026-27ના રૂા.235 કરોડના અંદાજપત્રને બહાલી આપી દેવામાં આવી છે. ચૂંટણી આચાર સંહિતા પૂર્વ યુનિ.ની ફાયનાન્સ અને બોર્ડ ઓફ મેનેજમેન્ટની મળેલી બેઠકમાં આ અંદાજપત્ર મંજૂર કરવામાં આવેલ હતું.
સૌરાષ્ટ્ર યુનિ.એ 60મા વર્ષમાં પ્રવેશ કરેલ હોય, ડાયમંડ જ્યુબેલી વર્ષમાં સંશોધનાત્મક પ્રોજેક્ટને વેગ મળે અને વેલ્ફેર એક્ટીવીટીને વેગ મળે તે માટે રુા.બે કરોડની રકમની અલગથી જોગવાઇ કરવામાં આવી છે.આ ઉપરાંત વિદ્યાર્થીઓના ઉચ્ચ શિક્ષણ માટે મોડલ ક્લાસરૂમ અને સ્પોર્ટસ એક્ટીવીટી માટે રૂા.6.25 કરોડની રકમ ફાળવવામાં આવી છે.
આ ઉપરાંત યુજીસીના નેશનલ સેમિનારમાં ભાગ લેવા બહારગામ જતાં વિદ્યાર્થી સંશોધકો માટે રેલવેના થ્રી ટાયર એસીનું ફેર આપવાની પણ અલગથી જોગવાઇ કરવામાં આવી છે. સ્પોર્ટસની પ્રવૃત્તિઓ વિકસાવવા માટે પણ ખાસ રકમ ફાળવવામાં આવી છે.
અહીં એ ઉલ્લેખનીય છે કે યુનિ.નું અંદાજપત્ર યુનિ.ની સત્તાવાર વેબસાઇટ પર તા.31 માર્ચ સુધીમાં મુકી દેવામાં આવે છે. પરંતુ આ વખતે હજુ સુધી યુનિ.ની વેબસાઇટ પર હજુ અંદાજપત્ર મુકવામાં નહીં આવતા યુનિ.ની વર્ષોથી ચાલી આવતી પરેપરા તુટી છે.
