New Delhi,તા.24
આજકાલ સુંદર દેખાવા અને વધતી ઉંમરની અસરોને છુપાવવા માટે લોકો નવા-નવા પ્રયોગો કરતા હોય છે. અત્યાર સુધી કરચલીઓ દૂર કરવા માટે ‘બોટોક્સ’ના ઇન્જેક્શન લેવા પડતા હતા.
જેમાં સોયનો દુખાવો અને ક્લિનિકના ચક્કર કાપવા પડતા. પરંતુ હવે ઇન્સ્ટાગ્રામ અને ફેસબુક જેવા સોશિયલ મીડિયા પ્લેટફોર્મ પર ‘બોટોક્સ સ્ટ્રીપ્સ’ અથવા ‘રિંકલ પેચ’ ખૂબ ધૂમ મચાવી રહ્યા છે.
દાવો કરવામાં આવી રહ્યો છે કે, આ પટ્ટીઓ લગાવીને તમે ઘરે બેઠા જ કરચલીઓથી છુટકારો મેળવી શકો છો. પણ શું આ દાવો સાચો છે? ચાલો આ બાબતને વિગતવાર અને સરળ રીતે સમજીએ.
શું છે આ બોટોક્સ સ્ટ્રીપ્સ અને તે કેવી રીતે કામ કરે છે?
આ પટ્ટીઓ એક ખાસ પ્રકારનાં કાગળ અથવા સિલિકોનમાંથી બનેલી હોય છે, જેની એક તરફ ચામડીને નુકસાન ન કરે તેવો ગુંદર હોય છે. આ પટ્ટીઓને કપાળ પર, આંખોની આજુબાજુ કે મોઢાની પાસે જ્યાં કરચલીઓ હોય ત્યાં ચોંટાડવામાં આવે છે.
આ પેચ ચામડીને મજબૂતીથી જકડી રાખે છે, જેના કારણે ત્યાંના સ્નાયુઓ હલી શકતા નથી. જ્યારે આપણે સૂઈ જઈએ છીએ ત્યારે ચામડી ખેંચાયેલી રહે છે અને તે કરચલીઓ પડવા દેતી નથી. આ એક રીતે ચામડીને આરામ આપવાનું અને તેને સપાટ રાખવાનું કામ કરે છે.
શું તે ખરેખર બોટોક્સ જેટલી જ અસરકારક છે?
ડોક્ટરોનું કહેવું છે કે આ પટ્ટીઓને ‘બોટોક્સ’ નામ માત્ર માર્કેટિંગ માટે આપવામાં આવ્યું છે. અસલી બોટોક્સ ઇન્જેક્શન સ્નાયુઓની અંદર જઈને કામ કરે છે, જ્યારે આ પટ્ટીઓ માત્ર ચામડીની ઉપરની સપાટી પર કામ કરે છે.
દિલ્હીના જાણીતાં ડર્મેટોલોજિસ્ટ ડો. કિરણ સેઠી જણાવે છે કે, આ સ્ટ્રીપ્સ કોઈ કાયમી ઈલાજ નથી. તે માત્ર થોડા સમય માટે ચામડીને સપાટ દેખાડવામાં મદદ કરે છે. જેવી તમે આ પટ્ટી કાઢી નાખશો અને થોડો સમય જશે, એટલે ચામડી ફરી પહેલા જેવી થઈ શકે છે.
જોકે, તેનો લાંબો સમય ઉપયોગ કરવાથી વ્યક્તિને વારંવાર મોઢું બગાડવાની કે કપાળ પર કરચલીઓ પાડવાની આદત છૂટી શકે છે, જે ભવિષ્યમાં નવી કરચલીઓ પડતા અટકાવી શકે.
ખર્ચ અને સાવચેતી
ભારતીય બજારમાં એકવાર વાપરી શકાય તેવી 12 પટ્ટીઓનું પેકેટ અંદાજે 400 થી 500 રૂપિયામાં મળે છે, જ્યારે વારંવાર વાપરી શકાય તેવા પેચ થોડા મોંઘા હોય છે. નિષ્ણાતોના મતે, એકવાર વાપરીને ફેંકી દેવાય તેવી પટ્ટીઓ વધુ સુરક્ષિત છે.
જો તમારી ચામડી ખૂબ જ સંવેદનશીલ હોય અને પટ્ટીના ગુંદરથી ખંજવાળ કે લાલાશ આવતી હોય, તો તેનો ઉપયોગ ટાળવો જોઈએ. ટુંકમાં કહીએ તો, આ બોટોક્સ સ્ટ્રીપ્સ મોંઘા ઇન્જેક્શનનો કાયમી વિકલ્પ નથી, પણ જો તમે ઓછો ખર્ચ કરીને અને સોયના દુખાવા વગર થોડા સમય માટે કરચલીઓ ઓછી દેખાડવા માંગતા હોવ, તો આ એક સારો અને બિનહાનિકારક રસ્તો સાબિત થઈ શકે છે.
