માત્ર સાફ-સફાઈ જ નહીં, ‘વેસ્ટમાંથી બેસ્ટ’ બનાવી બંધ પડેલાં મોંઘા સાધનો ફરી ઉપયોગમાં લેવાયા
Rajkot,
ગુજરાતભરમાં ૧ જુલાઈથી શરૂ થયેલા રાજ્યવ્યાપી “નમો સ્વચ્છતા અભિયાન”નો આજે સાતમો અને આખરી દિવસ છે. ૧ જુલાઈથી શરૂ થયેલા આ મહાઅભિયાનના માત્ર ૬ જ દિવસમાં રાજ્યભરની ૧૨ હજારથી વધુ આરોગ્ય સંસ્થાઓમાં ૩૮ હજારથી વધુ બિનઉપયોગી વસ્તુઓની ઓળખ કરવામાં આવી છે અને કુલ ૪.૪૭ લાખથી વધુ વસ્તુઓનો સ્થળ પર જ નિકાલ કરવામાં આવ્યો છે. જેના પરિણામે ૧૬૫ ઓરડાઓ ખાલી થયા છે.
આ અભિયાન માત્ર સાફ-સફાઈ પૂરતું સીમિત ન રહેતા ‘વેસ્ટમાંથી બેસ્ટ’નું ઉત્તમ ઉદાહરણ બન્યું છે. હોસ્પિટલોમાં બંધ પડેલી અંદાજે ૩૪,૧૬૬ જેટલી વિવિધ વસ્તુઓનું સફળતાપૂર્વક રિપેરિંગ કરીને તેને પુનઃ કાર્યરત કરવામાં આવી છે. જેમાં લાકડા/લોખંડના ફર્નિચર (ખુરશી, ટેબલ, કબાટ, પલંગ) ઉપરાંત વર્ષોથી બંધ પડેલી એમ્બ્યુલન્સ, સરકારી વાહનો, ઇલેક્ટ્રોનિક્સ/આઈ.ટી. ગેજેટ્સ અને મોંઘા તબીબી ઉપકરણો (મેડિકલ ઇક્વિપમેન્ટ્સ) શામેલ છે.
અભિયાનના છઠ્ઠા દિવસે જ રાજ્યભરની સંસ્થાઓમાં ૩૮ હજારથી વધુ બિનઉપયોગી વસ્તુઓ ઓળખી કાઢી, ૪.૪૭ લાખથી વધુ વસ્તુઓનો નિકાલ કરાયો હતો, જેનાથી એક જ દિવસમાં ૧૬૫ ઓરડા ખાલી થયા હતા. તેમજ છઠ્ઠા દિવસે એકસાથે ૨૩ હજારથી વધુ ફર્નિચર અને તબીબી ઉપકરણોનું સમારકામ પૂર્ણ કરાયું હતું. આ સઘન ઝુંબેશ હેઠળ માત્ર ભંગારનો નિકાલ જ નહીં, પરંતુ દર્દીઓની સુરક્ષાને સર્વોચ્ચ અગ્રતા આપીને ફાયર સેફ્ટી અને ઈલેક્ટ્રિકલ સેફ્ટીનું ખાસ ઓડિટ તથા ચેકિંગ કરવામાં આવ્યું છે. શુદ્ધ પીવાના પાણીની ઉપલબ્ધતા માટે પાઈપલાઈનનું સમારકામ, માઈનર સિવિલ વર્ક્સ (નાનું-મોટું રિપેરિંગ) તેમજ હોસ્પિટલ ઇન્ફેક્શન પ્રિવેન્શન એન્ડ કંટ્રોલની કામગીરી સુનિશ્ચિત કરાઈ છે.
રાજકોટ જિલ્લાની પ્રતિષ્ઠિત પી.ડી.યુ સિવિલ હોસ્પિટલ, ડિસ્ટ્રિક્ટ હોસ્પિટલ, મેડિકલ કોલેજ, ૫ સબ ઇન્સ્ટિટ્યૂટ, ૧૨ સીએચસી અને ૫૫ પીએચસી કેન્દ્રોમાં આ અભિયાનની અભૂતપૂર્વ અસર જોવા મળી હતી. જેમાં ક્લાસ-૧ અધિકારીઓ, તબીબો, નર્સિંગ સ્ટાફ અને વહીવટી કર્મચારીઓએ પોતે જ મેદાનમાં ઉતરીને કેમ્પસને ચકચકાટ બનાવ્યું હતું. હોસ્પિટલના સૌથી સંવેદનશીલ ગણાતા ફાર્મસી વિભાગ અને મેડિકલ લેબોરેટરીમાં વિશેષ ડ્રાઇવ ચલાવીને કરશો જૂના રેકોર્ડ્સ, બિનઉપયોગી કેમિકલ બોટલ્સ અને જૂની કિટ્સનો કાયદેસર નિકાલ કરાયો હતો. પાર્કિંગ અને ગ્રાઉન્ડમાં ધૂળ ખાતા ભંગારને હટાવીને આખું કેમ્પસ દર્દી-સ્નેહી બનાવવામાં આવ્યું છે.
