New Delhi, તા. 10
ભારતનાં યુવા ટેનિસ ખેલાડી અર્ણવ પાપરકરે વિમ્બલ્ડનમાં ઈતિહાસ રચી દીધો છે. તે વિમ્બલ્ડન બોયઝ સિંગલ્સની ક્વાર્ટર ફાઈનલમાં પહોંચનારો છેલ્લાં 36 વર્ષમાં પ્રથમ ભારતીય ખેલાડી બન્યો છે. 18 વર્ષીય અર્ણવે બુધવારે રમાયેલી મેચમાં જાપાનનાં ર્યો તાબાતાને માત્ર 52 મિનિટમાં 6-2, 6-1થી હરાવીને અંતિમ આઠમાં પોતાની જગ્યા પાકી કરી લીધી છે. વર્ષ 1990માં લિએન્ડર પેસે આ સિદ્ધિ મેળવી હતી અને ત્યારબાદ તેઓ જુનિયર વિમ્બલ્ડન ચેમ્પિયન બન્યાં હતાં.
અર્ણવ હવે લિએન્ડર પેસ, રામનાથન ક્રિષ્નન અને રમેશ ક્રિષ્નન જેવા દિગ્ગજ ભારતીય ખેલાડીઓની એલિટ ક્લબમાં સામેલ થઈ ગયો છે. પુણેનો વતની અર્ણવ પાપરકર હાલમાં આઈટીએફ (ITF) જુનિયર રેન્કિંગમાં વિશ્વમાં 19મા ક્રમે છે. છ ફૂટથી વધુ ઊંચાઈ ધરાવતો આ ખેલાડી પુણેમાં હેમંત બેન્દ્રે ટેનિસ એકેડમીમાં કોચ પ્રોસનજીત પોલ પાસે અને સ્પેનની સોટો એકેડમીમાં કોચ નાઈજેલ બીવર્સ હેઠળ તાલીમ મેળવે છે.
તેને મહારાષ્ટ્ર સરકારની “મિશન લક્ષ્યવેધ” યોજના અને અન્ય સંસ્થાઓ દ્વારા આર્થિક સહયોગ મળી રહ્યો છે. ચાલું વર્ષે તે ઓલ ઈન્ડિયા ટેનિસ એસોસિએશન (AITA) બોયઝ અંડર-18માં સતત 21 અઠવાડિયા સુધી દેશમાં નંબર-1 પોઝિશન પર રહ્યો હતો.
વિમ્બલ્ડનની આ સફરમાં અર્ણવે બીજા રાઉન્ડમાં અમેરિકાનાં વર્લ્ડ નંબર-3 કીટોન હેન્સને પણ હરાવીને મોટો ઉલટફેર સર્જ્યો હતો. તાબાતા સામેની મેચમાં અર્ણવે શાનદાર પ્રદર્શન કર્યું હતું, જ્યાં તેની સૌથી ફાસ્ટ સર્વિસની ઝડપ 208 કિમી/કલાક નોંધાઈ હતી.
અગાઉ તાબાતા સામે બે વાર મેચ ગુમાવી ચૂકેલા અર્ણવે જીત બાદ જણાવ્યું કે તે હવે માનસિક રીતે ઘણો શાંત અને મજબૂત થયો છે. હવે સેમિફાઇનલમાં જગ્યા બનાવવા માટે ક્વાર્ટર ફાઈનલમાં તેનો મુકાબલો અમેરિકાનાં ક્વોલિફાયર જોર્ડન લી સામે થશે.
