‘Mysa’ માટે રશ્મિકાએ અંડરવોટર એક્શન સીન કર્યા

ભારતીય સિનેમાનો પ્રથમ મહિલા-કેન્દ્રિત અંડરવોટર ફાઇટ સીન કર્યાનો નિર્માતાઓનો દાવો

Mumbai, તા.૧૧

રશ્મિકા મંદાનાએ પોતાની આગામી પેન-ઈન્ડિયા ફિલ્મ ‘માયસા’ માટે એક મહત્વનો અંડરવોટર એક્શન સીન પુરો કર્યો છે. ફિલ્મના નિર્માતાઓનો દાવો છે કે આ ભારતીય સિનેમાની પ્રથમ મહિલા-કેન્દ્રિત અંડરવોટર ફાઇટ સિક્વન્સ છે. આ ફિલ્મમાં રશ્મિકા પોતાની કારકિર્દીના અત્યાર સુધીના સૌથી પડકારજનક એક્શન અવતારમાં જોવા મળશે. રવિન્દ્ર પુલેના ડિરેક્શનમાં બની રહેલી અને ફોર્મ્યુલા ફિલ્મ્સ દ્વારા નિર્મિત ‘માયસા’ આદિવાસી પ્રદેશોની પૃષ્ઠભૂમિ પર આધારિત એક ઇમોશનલ એક્શન થ્રિલર છે. ફિલ્મમાં રશ્મિકાનો એક્શન અવતાર પહેલેથી જ ચર્ચામાં છે અને હવે આ અંડરવોટર સિક્વન્સથી ફિલ્મ વિશે ઉત્સુકતા વધી છે.નિર્માતાઓના જણાવ્યા અનુસાર, રશ્મિકાએ આ અંડરવોટર એક્શન સિક્વન્સ કોઈપણ એક્શન ડબલની મદદ લીધા વિના પોતે જ શૂટ કરી છે. આ સિક્વન્સનું શૂટિંગ બે દિવસમાં થઈ ગયું હતું, જેમાં રશ્મિકાએ કુલ મળીને લગભગ ૨૦ કલાક પાણીની અંદર વિતાવ્યા હતા. નિર્માતાઓએ આ સિક્વન્સને ફિલ્મની સૌથી મોટી વિશેષતાઓમાંથી એક ગણાવી છે અને ભારતીય સિનેમામાં અત્યાર સુધીના સૌથી મહત્ત્વાકાંક્ષી એક્શન સીનમાંની એક હોવાનું જણાવ્યું છે.આ સિદ્ધિને બિરદાવવા નિર્માતાઓએ સોશિયલ મીડિયા પર શૂટિંગ દરમિયાનના કેટલાક ફોટોગ્રાફ્સ અને બિહાઇન્ડ-ધ-સીન્સ દૃશ્યો શેર કર્યા. તેની સાથે તેમણે લખ્યું, “ભારતીય સિનેમાની પહેલો મહિલા-કેન્દ્રિત અંડરવોટર ફાઇટ સિક્વન્સ, જેમાં રશ્મિકા મંદાના લીડ કરી રહી છે. સપાટીની ક્યારેય મર્યાદા નથી હોતી. પાણીની ઊંડાઈમાં એક એવી લડાઈ છુપાયેલી છે, જેવી ભારતીય સિનેમાએ ક્યારેય જોઈ નથી. આ પ્રચંડ રૂપ જોવા માટે તૈયાર થઈ જાઓ.”બીજી પોસ્ટમાં તેમણે લખ્યું, “એક્શન સિનેમાનો એક નવો અધ્યાય શરૂ થાય છે. ટીમ માયકાએ રશ્મિકા મંદાનાની હાજરીમાં ભારતીય સિનેમાની પ્રથમ મહિલા અંડરવોટર ફાઇટ સિક્વન્સ સફળતાપૂર્વક પુરી કરી છે. ભારતીય સિનેમામાં નવી લહેર લાવનારા આ ભવ્ય એક્શન દૃશ્યને જોવા માટે તૈયાર રહો. ટીઝરની જાહેરાત ટૂંક સમયમાં કરવામાં આવશે. ફિલ્મ ૨૦૨૬માં સિનેમાઘરોમાં રિલીઝ થશે.”રશ્મિકા મંદાનાએ પણ પોતાના સોશિયલ મીડિયા પર આ અનુભવ શેર કરતાં લખ્યું, “હું જાણું છું કે હું થોડા સમયથી સોશિયલ મીડિયામાં સક્રિય નહોતી, પરંતુ અમે આ કામમાં વ્યસ્ત હતાં. મારા જીવનમાં અત્યાર સુધી મેં કરેલી સૌથી પડકારજનક બાબત આ છે. કદાચ અમે એટલે જ થોડા પાગલ છીએ, પરંતુ એ જ વાત મને સૌથી વધુ ઉત્સાહિત કરે છે. ચાલો શરૂ કરીએ! માયસા” ફિલ્મનું ટીઝર હજુ સુધી જાહેર કરવામાં આવ્યું નથી. જોકે, ‘માયસા’ને મજબૂત ભાવનાત્મક કથાવસ્તુ ધરાવતી ભવ્ય એક્શન એન્ટરટેનર તરીકે રજૂ કરવામાં આવી રહી છે. અંડરવોટર સિક્વન્સનું શૂટિંગ પૂરું થતાં હવે ટૂંક સમયમાં ફિલ્મના પ્રમોશનની શરૂઆત થવાની શક્યતા છે. ૨૦૨૬માં રિલીઝ થનારી આ ફિલ્મ વર્ષના સૌથી ચર્ચિત પેન-ઈન્ડિયા પ્રોજેક્ટ્‌સમાંની એક માનવામાં આવી રહી છે.