New Delhi, તા. 4
ગ્લાસગો કોમનવેલ્થ ગેમ્સના મેડલ વિજેતાઓ પર પૈસા વરસવાનું શરૂ થઈ ગયું છે. ભારતીય વેઇટલિફ્ટરોને રમતગમત મંત્રી મનસુખ માંડવિયાએ સોમવારે સન્માનિત કર્યા. તેમને ઇનામી રકમના ચેક પ્રદાન કરવામાં આવ્યાં. વળી, રાજ્ય સરકારોએ પણ ઇનામોની જાહેરાત કરવાનું શરૂ કરી દીધું છે.
વેઇટલિફ્ટર જ્ઞાનેશ્વરી દેવીને સિલ્વર મેડલ જીતવા બદલ છત્તીસગઢ સરકારે બઢતી અને ઇનામી રકમ આપવાની જાહેરાત કરી. આ પહેલાં શનિવારે મધ્ય પ્રદેશ સરકારે સિલ્વર મેડલ જીતનારા રાજ્યનાં ખેલાડીઓને ઇનામી રકમ અને સરકારી નોકરી આપવાની જાહેરાત કરી હતી.
કેટલા નાણાં અપાયા (કેન્દ્ર સરકાર)
* ગોલ્ડ મેડલ વિજેતા મીરાબાઈ ચાનુને 30 લાખ રૂપિયાનો ચેક પ્રદાન કરવામાં આવ્યો
* દરેક સિલ્વર મેડલ વિજેતા વેઇટલિફ્ટરને 20 લાખ રૂપિયાનો ચેક આપવામાં આવ્યો
* બ્રોન્ઝ મેડલ વિજેતા વેઇટલિફ્ટરને 10 લાખ રૂપિયાની ઇનામી રકમ પ્રદાન કરવામાં આવી
છત્તીસગઢ સરકાર
* 53 કિગ્રા વેઇટલિફ્ટિંગ સ્પર્ધાની સિલ્વર મેડલ વિજેતા જ્ઞાનેશ્વરી યાદવને 30 લાખ રૂપિયાની પ્રોત્સાહન રકમ
* આ ઉપરાંત રાજ્ય સરકારે જ્ઞાનેશ્વરીને ડીએસપી પદ પર ‘આઉટ ઓફ ટર્ન’ બઢતી આપવાની ઘોષણા કરી
મધ્ય પ્રદેશ સરકાર
મધ્ય પ્રદેશ સરકારે જૂડો અને વેઇટલિફ્ટિંગમાં સિલ્વર મેડલ જીતનારા રાજ્યનાં ખેલાડીઓ યામિની અને અજય બાબુને 25-25 લાખ રૂપિયાની ઇનામી રકમ તથા સરકારી નોકરી આપવાની શનિવારે ઘોષણા કરી હતી.
