New Delhi, તા.11
કેન્દ્ર સરકારે કહ્યું કે ઝીરો TDS સર્ટિફિકેટની ઓનલાઈન અરજી માટે ઈન્કમ ટેક્સથી જોડાયેલા નિયમો ટૂંક સમયમાં નોટિફાય કરી દેવામાં આવશે. નાણાં રાજ્ય મંત્રી પંકજ ચૌધરીએ લોકસભામાં એક પ્રશ્નનાં લેખિત જવાબમાં આ વાત કહી હતી.
તેમણે કહ્યું કે આ માટે વર્તમાન નાણાકીય વર્ષના સામાન્ય બજેટમાં જોગવાઈ કરવામાં આવી હતી અને તેને લાગું કરવા માટે આવકવેરા વિભાગ નિયમો નક્કી કરી રહ્યું છે. નિયમો જાહેર થયા પછી આવકવેરા દાતાઓ લોઅર અથવા નિલ TDS સર્ટિફિકેટ માટે ઓનલાઈન અરજી કરી શકશે.
ચૌધરીએ જણાવ્યું હતું કે ઈન્કમ ટેક્સ એક્ટ 2025 ના સેક્શન 395(1) માં નિલ અથવા લોઅર રેટ્સ પર TDS માટે સર્ટિફિકેટ આપવાની જોગવાઈ છે. ફાઈનાન્સ એક્ટ 2026 હેઠળ નાના કરદાતાઓ પર નિયમોનાં પાલનનો બોજ ઘટાડવા માટે આ વિકલ્પ રાખવામાં આવ્યો છે કે ઓછા અથવા નિલ ડિડક્શનના કેસમાં સર્ટિફિકેટ માટે ઓનલાઈન અરજી કરી શકાય છે. જે પણ શરતો નક્કી કરવામાં આવશે, તે મુજબ અરજી સ્વીકારવામાં કે ફગાવવામાં આવી શકે છે.
સામાન્ય રીતે કોઈ કરદાતા લોઅર અથવા નિલ TDS સર્ટિફિકેટ માટે ત્યારે અરજી કરે છે, જ્યારે તેની વાસ્તવિક ટેક્સ જવાબદારી કપાઈ શકતાં TDS કરતાં ઓછી હોવાનું અનુમાન હોય. આવી અરજીથી કરદાતા વધુ ટેક્સ ડિડક્શનની સ્થિતિમાંથી બચી જાય છે અને તેને પાછળથી રિફંડ ક્લેમ કરવું પડતું નથી.
નાણાકીય વર્ષ 2027 ના સામાન્ય બજેટમાં સૂચિત સુધારા અનુસાર, કરદાતાઓ લોઅર TDS સર્ટિફિકેટ માટે ટેક્સ ઓથોરિટી પાસે ઈલેક્ટ્રોનિક રીતે અરજી કરી શકશે.
