Ahmedabad તા, 25
વર્ષ 2030માં યોજાનારી કોમનવેલ્થ ગેમ્સની પૂર્વ તૈયારીના ભાગરૂપે અમદાવાદ શહેરનો અત્યાધુનિક GIS ડેટાબેઝ તૈયાર કરવા ઇ-ગવર્નિંગ કમિટીએ મંજૂરી આપી છે. રૂ. 240 કરોડનાં ખર્ચે હાથ ધરાનારા આ પ્રોજેક્ટમાં શહેરની 25 લાખ મિલકતોનું જીઓ-કોડિંગ કરવામાં આવશે. આ ઉપરાંત, જમીનની અંદર પથરાયેલી પાણી, ડ્રેનેજ અને સ્ટોર્મ વોટર લાઈનોના ચોક્કસ નેટવર્કનો રિપોર્ટ તૈયાર કરાશે. આ કામગીરી ખાનગી એજન્સી જેનેસિસ ઇન્ટરનેશનલ દ્વારા અઢી વર્ષમાં પૂર્ણ કરાશે, જે બાદ 5 વર્ષ સુધી તેના ઓપરેશન અને મેન્ટેનન્સની જવાબદારી પણ એજન્સી જ સંભાળશે.
સર્વેની કામગીરી બે તબક્કામાં હાથ ધરાશે, જેમાં પ્રથમ તબક્કામાં 9 લાખ અને બીજા તબક્કામાં 16 લાખ મિલકતોનું જીઓ-કોડિંગ કરાશે. સમગ્ર સર્વે માટે ડ્રોન અને એરક્રાફ્ટના હાઈ-રિઝોલ્યુશન કેમેરાથી 3D નકશો તૈયાર કરવામાં આવશે. ગ્રાઉન્ડ પેનિટ્રેટિંગ રડારથી અંડરગ્રાઉન્ડ લાઈનોનું સચોટ લોકેશન મેળવાશે અને વાહનો પર સેન્સર લગાવી ગૂગલ સ્ટ્રીટ વ્યૂ જેવો 360 ડિગ્રી વ્યૂ રેકોર્ડ કરાશે.
દરેક મિલકતનો ઘરે-ઘરે સર્વે કરીને તેમને એક યુનિક ‘ડિજિટલ ડોર આઈડી’ ફાળવવામાં આવશે. આ સિસ્ટમ અમલી બનવાથી મ્યુનિસિપલ કોર્પોરેશનને અનેકવિધ ફાયદા થશે. વેરાના ચોપડે ન નોંધાયેલી મિલકતો ઓળખી શકાશે, જેનાથી પ્રોપર્ટી ટેક્સની આવકમાં વધારો થશે. અંડરગ્રાઉન્ડ લાઈનોમાં લીકેજ કે ફોલ્ટ સમયે આખો રસ્તો ખોદવાને બદલે ચોક્કસ જગ્યાએ જ ખોદકામ કરી શકાશે.
આ ઉપરાંત, એસ્ટેટ વિભાગની મિલકતો અને પ્લોટ્સનું જીઓ-કોડિંગ થવાથી ગેરકાયદે દબાણો સરળતાથી શોધી શકાશે તેમજ અધિકારીઓ ડેશબોર્ડ પરથી જ તમામ પ્રોજેક્ટ્સનું સચોટ મોનિટરિંગ અને ભવિષ્યનું ઇન્ફ્રાસ્ટ્રક્ચર પ્લાનિંગ કરી શકશે. નાગરિકો માટે પણ આ યોજના ખૂબ જ સુવિધાજનક સાબિત થશે. અંડરગ્રાઉન્ડ લાઈનોના સમારકામ માટે વારંવાર થતાં આડેધડ ખોદકામ, રોડ ડાઇવર્ઝન અને ટ્રાફિકની સમસ્યામાંથી મુક્તિ મળશે.
ફરિયાદો જીઓ-ટેગ થવાથી રસ્તાના ખાડા કે ગટર ઊભરાવાની સમસ્યાઓનું સીધા લોકેશન સાથે સચોટ અને ઝડપી નિવારણ આવશે. તેમજ બિલ્ડિંગ પ્લાન, ફાયર એનઓસી અને ટેક્સ જેવી કામગીરી જીઆઈએસ પ્લેટફોર્મ સાથે લિંક થવાથી તમામ સરકારી કામકાજ ઝડપી, પારદર્શક અને ભ્રષ્ટાચાર મુક્ત બનશે.
