પોલીસે પુણા-ઉમરવાડા વિસ્તારમાં અલગ-અલગ સ્થળોએ દરોડા પાડી ચાર બોગસ ડોક્ટરોને ઝડપી પાડ્યા
Surat તા.૨૮
સુરત શહેરમાં ડિગ્રી કે માન્ય લાયકાત વગર મેડિકલ પ્રેક્ટિસ કરતા બોગસ ડોક્ટરો સામે પોલીસ દ્વારા કાર્યવાહી તેજ કરવામાં આવી છે. ઝોન-૧ એલસીબી અને પુણા પોલીસની સંયુક્ત ટીમે પુણા-ઉમરવાડા વિસ્તારમાં અલગ-અલગ સ્થળોએ દરોડા પાડી ચાર બોગસ ડોક્ટરોને ઝડપી પાડ્યા છે. પોલીસના જણાવ્યા મુજબ ઝડપાયેલા આરોપીઓ પૈકી કેટલાક માત્ર ૧૦મું, ૧૧મું કે ૧૨મું ધોરણ પાસ છે અને તેમ છતાં છેલ્લા કેટલાય વર્ષોથી ડોક્ટર તરીકે પ્રેક્ટિસ કરતા હોવાનું સામે આવ્યું છે. પોલીસ કાર્યવાહીમાં ચારેય આરોપીઓ પાસેથી કુલ રૂ. ૪,૯૦,૯૮૧ની કિંમતનો મેડિકલ સામાન અને એલોપેથી દવાઓનો જથ્થો મળી આવ્યો હતો. પોલીસે દવાઓ અને અન્ય મેડિકલ સામાન કબજે કરી કાયદેસરની કાર્યવાહી હાથ ધરી છે.
ડિગ્રી વગર દર્દીઓની સારવાર કરતા હોવાની બાતમી સુરત શહેરમાં ડિગ્રી વગર મેડિકલ પ્રેક્ટિસ કરતા બોગસ ડોક્ટરોને શોધી કાઢવા સૂચના આપવામાં આવી હતી. આ સૂચનાના આધારે ઝોન-૧ એલસીબીની ટીમે બાતમીદારો પાસેથી માહિતી એકત્ર કરવાની કામગીરી શરૂ કરી હતી. પુણા-ઉમરવાડા વિસ્તારમાં કેટલાક લોકો કોઈ માન્ય મેડિકલ ડિગ્રી કે લાયસન્સ વગર ક્લિનિક અને દવાખાનાં ચલાવી દર્દીઓની સારવાર કરી રહ્યા છે.
બાતમીના આધારે એલસીબી અને પુણા પોલીસની ટીમે અલગ-અલગ સ્થળોએ તપાસ હાથ ધરી હતી. ચાર સ્થળોએ કાર્યવાહી, ચારેય શખ્સો ઝડપાયા પોલીસે પુણા-ઉમરવાડા વિસ્તારમાં કુલ ચાર સ્થળોએ કાર્યવાહી કરી હતી. જેમાં રાજીવનગર ઝૂંપડપટ્ટીના પ્લોટ નં. ૨૨૬, આશાનગર ઝૂંપડપટ્ટીના પ્લોટ નં. ૧૩૪ ખાતે આવેલ ‘સંજીવ ચિકિત્સાલય’, રાજીવનગર ઝૂંપડપટ્ટીના પ્લોટ નં. ૬૩૧ અને પ્લોટ નં. ૭૭ ખાતે તપાસ કરવામાં આવી હતી. તપાસ દરમિયાન ચારેય સ્થળોએ લોકો પોતાને ડોક્ટર તરીકે ઓળખાવી દર્દીઓની સારવાર કરતા હોવાનું પોલીસના ધ્યાનમાં આવ્યું હતું. પોલીસના જણાવ્યા પ્રમાણે આરોપીઓ પાસે કોઈ માન્ય મેડિકલ ડિગ્રી ન હોવા છતાં તેઓ એલોપેથી દવાઓનો ઉપયોગ કરીને બીમાર દર્દીઓની સારવાર કરતા હતા.
આરોપીઓ પાસે મેડિકલ પ્રેક્ટિસ માટે જરૂરી લાયસન્સ કે માન્ય આધાર ન હોવા છતાં દવાખાનાં ચલાવી દર્દીઓને સારવાર આપવામાં આવતી હોવાનો આક્ષેપ છે. ૧૦થી ૧૨ પાસ, છતાં વર્ષોથી ‘ડોક્ટર’ તરીકે પ્રેક્ટિસ પોલીસની કાર્યવાહીમાં ઝડપાયેલા ચારેય આરોપીઓની શૈક્ષણિક લાયકાત અને તેઓ કેટલા સમયથી મેડિકલ પ્રેક્ટિસ કરતા હતા તેની વિગતો પણ સામે આવી છે.
પોલીસના જણાવ્યા મુજબ આરોપીઓ પૈકી કેટલાક માત્ર ૧૦મું, ૧૧મું અને ૧૨મું ધોરણ સુધી અભ્યાસ કરેલા છે. તેમ છતાં તેઓ લાંબા સમયથી ડોક્ટર તરીકે પ્રેક્ટિસ કરી રહ્યા હોવાનું તપાસમાં સામે આવ્યું છે. પોલીસે જણાવ્યું છે કે આ પ્રકારની ગેરકાયદેસર મેડિકલ પ્રેક્ટિસના કારણે યોગ્ય તબીબી લાયકાત વગર દર્દીઓની સારવાર થતી હોવાથી દર્દીઓના જીવન અને શારીરિક સલામતી સામે ગંભીર જોખમ ઊભું થઈ શકે છે. પકડાયેલા ચાર આરોપીઓ કોણ છે?
પોલીસે આ કેસમાં ચાર આરોપીઓની ધરપકડ કરી
૧. સમરબહાદુર ભિન્ગુ પાલ (ઉંમર ૫૨) — વ્યવસાયે ડોક્ટર તરીકે ઓળખાવતો હતો. તે ગોડાદરા વિસ્તારમાં વૃંદાવન પાર્ક સોસાયટીમાં રહેતો હોવાનું પોલીસની પ્રેસનોટમાં જણાવાયું છે. મૂળ ઉત્તર પ્રદેશના જોનપુર જિલ્લાના રહેવાસી હોવાનું સામે આવ્યું છે.
૨. તેજબહાદુર મીર્જારામભાઈ નિશાદ (ઉંમર ૫૩) — પુણા-ઉમરવાડાની આશાનગર ઝૂંપડપટ્ટીમાં રહેતો હતો અને ત્યાં ‘સંજીવ ચિકિત્સાલય’ નામે ક્લિનિક ચલાવતો હોવાનું પોલીસના ધ્યાનમાં આવ્યું છે. મૂળ ઉત્તર પ્રદેશના જોનપુર જિલ્લાના રહેવાસી હોવાનું જણાવાયું છે.
૩. પ્રશાંતભાઈ પ્રોમથનભાઈ માલાકર (ઉંમર ૩૭) — પુણા-ઉમરવાડા વિસ્તારમાં રહેતો હતો. મૂળ પશ્ચિમ બંગાળના ૨૪ પરગણા જિલ્લાના રહેવાસી હોવાનું પોલીસની પ્રેસનોટમાં જણાવાયું છે.
૪. સુબલ સુનિલ ગાચ્છી (ઉંમર ૪૨) — લિંબાયત વિસ્તારમાં રહેતો હતો અને મૂળ પશ્ચિમ બંગાળના નાદિયા જિલ્લાના રહેવાસી હોવાનું પોલીસના જણાવ્યા મુજબ સામે આવ્યું છે. રૂ. ૪.૯૦ લાખનો મેડિકલ જથ્થો કબજે પોલીસે ચારેય સ્થળેથી તપાસ દરમિયાન મેડિકલ પ્રેક્ટિસમાં ઉપયોગમાં લેવાતો સામાન તેમજ એલોપેથી દવાઓનો જથ્થો કબજે કર્યો હતો. સમગ્ર જપ્ત મુદ્દામાલની કુલ કિંમત રૂ. ૪,૯૦,૯૮૧ હોવાનું પોલીસ દ્વારા જણાવાયું છે. પોલીસ હવે કબજે કરાયેલા મેડિકલ સામાન અને દવાઓ અંગે પણ વધુ તપાસ કરી રહી છે કે આરોપીઓ કયા પ્રકારની દવાઓ દર્દીઓને આપતા હતા અને કેટલા સમયથી આ પ્રવૃત્તિ ચાલી રહી હતી.
