Mumbai,તા.19
ફિલ્મ ઈન્ડસ્ટ્રીમાંથી એક દુઃખદ સમાચાર સામે આવ્યા છે. તમિલ સિનેમાના પ્રખ્યાત કોમેડી એક્ટર રોબો શંકરનું 46 વર્ષની વયે નિધન થઈ ગયુ છે. તેમણે ચેન્નાઈની GEM હોસ્પિટલમાં અંતિમ શ્વાસ લીધા છે. પ્રાપ્ત માહિતી પ્રમાણે એક ફિલ્મના સેટ પર બેભાન થઈ ગયા બાદ તેમને ચેન્નાઈની એક પ્રાઈવેટ હોસ્પિટલમાં દાખલ કરવામાં આવ્યા હતા.
અભિનેતા કમલ હાસને તમિલમાં રોબો શંકરને હૃદયપૂર્વક શ્રદ્ધાંજલિ આપી છે. તેમણે સોશિયલ મીડિયા પ્લેટફોર્મ X પર લખ્યું કે, રોબો શંકર. રોબો માત્ર એક નિક નામ છે. મારી ડિક્શનરીમાં તું એક માણસ છો. તું મારો નાના ભાઈ છે. શું તું મને છોડીને જતો રહીશ? તારું કામ પૂરું થયું, તું જતો રહ્યો. મારું કામ અધૂરું છે. તું આવતી કાલ અમારા માટે છોડી ગયો. તેથી, આવતીકાલ આપણી છે. રોબો શંકરના પાર્થિવ શરીરને તેમના ચેન્નાઈ સ્થિત ઘરે લઈ જવામાં આવશે અને આજે તેમના અંતિમ સંસ્કાર કરવામાં આવશે. ફિલ્મ ઈન્ડસ્ટ્રીના સાથીઓ, જૂના કો-સ્ટાર અને ચાહકો પણ તેમને શ્રદ્ધાંજલિ આપવા અને અંતિમ વિદાય આપવા માટે હાજરી આપશે. અભિનેતાના પરિવારમાં તેમની પત્ની પ્રિયંકા રોબો શંકર, પુત્રી ઈન્દ્રજા શંકર અને પરિવાર છે.
એક્ટરને તાજેતરમાં જ કમળો થયો હતો અને રિકવરી દરમિયાન તેનું વજન ઘટી ગયું હતું. તેની રિકવરી દરમિયાન તેના નબળા દેખાવે ચાહકોમાં ચિંતા ફેલાવી હતી. જોકે, તે કામ પર પાછો ફર્યો અને સન ટીવી પર એક કૂકિંગ રિયાલિટી શોમાં પણ દેખાયો હતો.
તમને જણાવી દઈએ કે, રોબો શંકર ટેલિવિઝન અને ફિલ્મ જગતમાં એક લોકપ્રિય ચહેરો હતો. ગામડાઓમાં અને ટેલિવિઝન શોમાં રોબોટે પોતાની કરતૂત દેખાડ્યા પછી તેમને રોબો નામ મળ્યું હતું. શંકર 1997થી ફિલ્મોમાં કામ કરી રહ્યા હતા. તેમણે સુપરસ્ટાર રજનીકાંતની ‘પડયપ્પા’ સહિત તમિલ ફિલ્મોમાં ઘણી ભૂમિકાઓ ભજવી હતી. વિજય સેતુપતિની ‘ઈધારકુઠાને આસાઈપટ્ટાઈ બાલકુમારા’માં પોતાની એક્ટિંગથી ફેમસ થયો હતો.
