જોગવડ સીમના રામદૂતનગર વિસ્તારમાં મેઘપર પોલીસની કાર્યવાહી, રૂ. ૪.૯૪ લાખનો મુદ્દામાલ કબજે, સપ્લાયર ફરાર
(નયના દવે દ્વારા)
Jamnagar,તા.૧૧
નશીલા માદક પદાર્થોના ગેરકાયદેસર વેપાર અને સેવન સામે ચાલી રહેલી ઝુંબેશ અંતર્ગત મેઘપર (પડાણા) પોલીસ સ્ટેશનની ટીમે જોગવડ ગામની સીમમાં રામદૂતનગર વિસ્તારમાં દરોડો પાડી હેરોઈન સહિતના માદક પદાર્થોના જથ્થા સાથે પંજાબના ત્રણ શખ્સોને ઝડપી પાડ્યા છે. પોલીસે તેમની પાસેથી કુલ ૨૩.૮૫ ગ્રામ હેરોઈન, મોફીન અને કોડેનનો જથ્થો, જેની કિંમત રૂ. ૪,૭૭,૦૦૦ થાય છે, તેમજ અન્ય મુદ્દામાલ મળી કુલ રૂ. ૪,૯૪,૪૦૦નો મુદ્દામાલ કબજે કર્યો છે.
મેઘપર (પડાણા) પોલીસ સ્ટેશનના સ્ટાફને પેટ્રોલિંગ દરમિયાન બાતમી મળી હતી કે જોગવડ ગામની સીમમાં રામદૂતનગર વિસ્તારમાં જયેશભાઈ ઉનડકટની ઓરડીઓ પૈકીની નંબર-૧૧ની ઓરડીમાં ભાડેથી રહેતા જશવંતસિંઘ પંજાબી, જગમીતસિંઘ પંજાબી અને થોમસ મસીહ નામના ત્રણ શખ્સો પાસે કેફી માદક પદાર્થનો પાવડર છે અને તેઓ હાલ ઓરડીમાં હાજર છે. જે બાતમીના આધારે પોલીસે દરોડો પાડ્યો હતો.
દરોડા દરમિયાન પોલીસે જશવંતસિંઘ રતનસિંઘ, થોમસ રણજીત મસીહ અને જગમીતસિંઘ સરબજીતસિંઘને ઝડપી લીધા હતા. ત્રણેય મૂળ પંજાબના રહેવાસી છે અને હાલ લાલપુર તાલુકાના જોગવડ સીમ વિસ્તારમાં મજૂરી કામ માટે રહેતા હોવાનું પોલીસ તપાસમાં સામે આવ્યું છે.
પોલીસે આ મામલે ત્રણેય આરોપીઓ ઉપરાંત માદક પદાર્થનો સપ્લાયર હોવાનું સામે આવેલ જગરૂપનસિંઘ, રહે. સકતરા ગામ, તા. પટ્ટી, જિ. તરનતારણ, પંજાબ, વિરુદ્ધ પણ ગુનો નોંધ્યો છે. જગરૂપનસિંઘ હાલ ફરાર હોવાથી તેને ઝડપી પાડવા તપાસ હાથ ધરવામાં આવી છે. આ અંગે મેઘપર (પડાણા) પોલીસ સ્ટેશનમાં એન.ડી.પી.એસ. એક્ટની કલમ ૮(સી), ૨૧(બી) અને ૨૯ મુજબ ગુનો નોંધવામાં આવ્યો છે.
આ કાર્યવાહી નાયબ પોલીસ મહાનિરીક્ષક નિર્લિપ્ત રાયની સૂચના, જામનગર જિલ્લા પોલીસ અધિક્ષક ડો. રવિ મોહન સૈનીના માર્ગદર્શન તથા લાલપુર વિભાગના મદદનીશ પોલીસ અધિક્ષક પ્રતિભાના સીધા માર્ગદર્શન હેઠળ મેઘપર (પડાણા) પોલીસ સ્ટેશનના પોલીસ ઇન્સ્પેક્ટર એ.એલ. બારસીયાની રાહબરીમાં કરવામાં આવી હતી. પો.સ.ઈ. એ.જી. જાડેજા સહિતની પોલીસ ટીમે કામગીરીને અંજામ આપ્યો હતો.
