બાઇક લઈને બન્ને ભાઈ કરદેજ માતાજીના દર્શને જતા અકસ્માત સર્જાયો : બાઇક ચાલક સામે શિહોર પોલીસ મથકે ફરિયાદ
Sihor, તા.૨૨
શિહોર-રાજકોટ હાઇવે રોડ પર આવેલા ચેતન હનુમાનજી મંદિર નજીક રવિવારે બપોરે એક કરૃણ માર્ગ અકસ્માત સર્જાયો હતો. પુરઝડપે અને બેફિકરાઈથી ચાલતી મોટરસાયકલે આગળ જતી બાઈકને પાછળથી જોરદાર ટક્કર મારતા એક વૃદ્ધનું સારવાર દરમિયાન મોત નીપજ્યું છે, જ્યારે અન્ય એક વ્યક્તિને શરીર પર ઈજાઓ પહોંચી છે.મળતી માહિતી મુજબ, ઉમરાળા તાલુકાના ઝાંઝમેર ગામના વતની મેણસુરભાઈ જીવાભાઈ ચાવડા (ઉં.વ. ૫૫) અને તેમના મોટા ભાઈ જેઠાભાઈ જીવાભાઈ ચાવડા (ઉં.વ. ૬૮) રવિવારે બપોરે આશરે ૪થ૦૦ વાગ્યાના સુમારે મોટરસાયકલ લઈને શિહોરથી કરદેજ ખાતે માતાજીના દર્શન કરવા જઈ રહ્યા હતા. દરમિયાન ખાખરીયાના પાટીયા પાસે પહોંચતા જ પાછળથી પૂરપાટ ઝડપે આવી રહેલી અન્ય એક બાઈકના (જીજે-૦૪-એફબી-૯૪૬૨) ચાલકે તેઓની બાઈકને જોરદાર ઠોકર મારી હતી.
આ અકસ્માતમાં બંને ભાઈઓ રોડ પર પછડાતા જેઠાભાઈને માથાના તેમજ કપાળના ભાગે ગંભીર ઈજાઓ પહોંચી હતી. સ્થાનિકોએ તાત્કાલિક ૧૦૮ એમ્બ્યુલન્સને જાણ કરતા બંનેને શિહોર સરકારી હોસ્પિટલ ખસેડવામાં આવ્યા હતા, જ્યાં ફરજ પરના તબીબે જેઠાભાઈ ચાવડાને મૃત જાહેર કર્યા હતા. જ્યારે અકસ્માત સર્જનાર બાઇક ચાલકને પણ ઈજાઓ પહોંચતા તેને વધુ સારવાર માટે ભાવનગરની સર ટી. હોસ્પિટલ ખાતે રીફર કરવામાં આવ્યો છે.આ બનાવ અંગે મેણસુરભાઈ ચાવડાની ફરિયાદના આધારે શિહોર પોલીસે બાઇક ચાલક વિરુદ્ધ ભારતીય નાગરિક સુરક્ષા સંહિતા અને મોટર વાહન અધિનિયમની વિવિધ કલમો હેઠળ ગુનો નોંધી આગળની કાનૂની તપાસ હાથ ધરી છે.
