7 દિવસમાં બીજા વિદ્યાર્થીનો આપઘાત
Rajkot ,તા.૨૫
શહેરની જાણીતી મારવાડી યુનિવર્સિટીમાંથી એક અત્યંત ચોંકાવનારી અને ચિંતાજનક ઘટના સામે આવી છે, જ્યાં માત્ર છ દિવસના ટૂંકા ગાળામાં આપઘાતનો બીજો બનાવ બનતા સમગ્ર કેમ્પસમાં અરેરાટી વ્યાપી ગઈ છે. શુક્રવારના રોજ આંધ્રપ્રદેશના વતની અને કોમ્પ્યુટર એન્જિનિયરિંગમાં અભ્યાસ કરતા વિદ્યાર્થી હેમંત ગંદમાન નામના યુવકે યુનિવર્સિટીની મેઈન બિલ્ડિંગ પરથી નીચે ઝંપલાવીને પોતાની જિંદગી ટૂંકાવી દીધી છે.
માત્ર પાંચ દિવસ પૂર્વે જ આ જ યુનિવર્સિટીમાં કોમ્પ્યુટર એન્જિનિયરિંગનો અભ્યાસ કરતી એક છાત્રાએ પણ અગમ્ય કારણોસર આત્મહત્યા કરી લીધી હતી. આ ઘટનાની શાહી હજુ સુકાઈ નહોતી ત્યાં જ વધુ એક આશાસ્પદ વિદ્યાર્થીના આપઘાતના પગલે યુનિવર્સિટી સંકુલમાં શોકનું મોજું ફરી વળ્યું છે. એક જ ક્ષેત્રના અને એક જ વિષયના વિદ્યાર્થીઓ દ્વારા ઉપરાઉપરી લેવાયેલા આ પગલાંથી યુનિવર્સિટીના અન્ય વિદ્યાર્થીઓ અને વાલીઓમાં ભારે ચિંતા પેદા થઈ છે.
ઘટનાની જાણ થતાં જ કુવાડવા રોડ પોલીસ સ્ટેશનનો કાફલો તાત્કાલિક સ્થળ પર દોડી ગયો હતો. પોલીસે મૃતક વિદ્યાર્થીના મૃતદેહને કબ્જે લઈને પોસ્ટમોર્ટમ અર્થે ખસેડવાની કામગીરી હાથ ધરી છે. આ સાથે જ પોલીસ દ્વારા સમગ્ર મામલે ગુનો નોંધીને ઊંડાણપૂર્વકની તપાસ શરૂ કરવામાં આવી છે.
પ્રાથમિક તપાસમાં મૃતક હેમંત મૂળ આંધ્રપ્રદેશનો હોવાનું જાણવા મળ્યું છે, જેથી પોલીસે તેના પરિવારજનોને પણ આ કમનસીબ ઘટના અંગે જાણ કરી દીધી છે. વિદ્યાર્થીએ આટલું અંતિમ પગલું કેમ ભર્યું, શું તે અભ્યાસના માનસિક તણાવ હેઠળ હતો કે પછી અન્ય કોઈ અંગત કારણોસર ડિપ્રેશનમાં હતો, તે દિશામાં પોલીસે તપાસનો ધમધમાટ તેજ કર્યો છે. આટલા ટૂંકા સમયગાળામાં મારવાડી યુનિવર્સિટીમાં બનેલી બીજી આત્મહત્યાની ઘટનાને પગલે યુનિવર્સિટીના તંત્ર સામે પણ સવાલો ઊભા થઈ રહ્યા છે. વિદ્યાર્થીઓના માનસિક સ્વાસ્થ્ય અને કેમ્પસના વાતાવરણ અંગે હવે વિવિધ સ્તરે ચર્ચાઓ જાગી છે.
