ખાનગી બાતમીના આધારે પોલીસે બોલેરો અટકાવી તપાસ કરતાં રૂ.૧ લાખનો ગાંજો મળ્યો બે મોબાઇલ અને કાર સહિત કુલ રૂ.૪.૩૪ લાખનો મુદ્દામાલ કબજે
(નયના દવે દ્વારા)
Jamnagar તા.૨૫ઃ
ધ્રોલ પોલીસ પેટ્રોલિંગ દરમિયાન મળેલી ખાનગી બાતમીના આધારે ધ્રોલ-જામનગર હાઈવે પર ચંદ્રોદય હોટલની સામે રોડ ઉપર કાર્યવાહી કરી બોલેરો કારમાંથી ૨ કિલો ગાંજો ઝડપી લીધો હતો. પોલીસે ગાંજા સહિત કારમાં સવાર બે શખ્સોને ઝડપી લઈ કુલ રૂ.૪.૩૪ લાખનો મુદ્દામાલ કબજે કર્યો છે. આ અંગે ધ્રોલ પોલીસ સ્ટેશનમાં એન.ડી.પી.એસ. એક્ટ હેઠળ ગુનો નોંધી વધુ તપાસ હાથ ધરવામાં આવી છે.
પોલીસ ફરિયાદ મુજબ તા.૨૪ સપ્ટેમ્બરના રોજ સવારે ધ્રોલ પોલીસ સ્ટેશનનો સ્ટાફ વિસ્તારમાં પેટ્રોલિંગમાં હતો. તે દરમિયાન ખાનગી બાતમીદાર મારફતે માહિતી મળી હતી કે, ધ્રોલ-જામનગર હાઈવે પર ચંદ્રોદય હોટલની સામે રોડની સાઈડમાં જી.જે.-૦૨-બી.ડી.-૫૬૫૫ નંબરની વર્ના કારમાં કેટલાક શખ્સો ગાંજા સાથે બેઠા છે. બાતમીના આધારે પોલીસ દ્વારા આગળની કાર્યવાહી હાથ ધરવામાં આવી હતી.
આ દરમિયાન પોલીસ સ્ટાફે જરૂરી કાર્યવાહી કરી વાહનોનું ચેકિંગ શરૂ કર્યું હતું. એક બોલેરો ગાડી જી.જે.-૧૮-જી.બી.-૬૬૮૭ રોકી તેમાં સવાર શખ્સોની પૂછપરછ તથા તપાસ કરવામાં આવી હતી. તપાસ દરમિયાન ગાંજો મળી આવતાં પોલીસ દ્વારા બે શખ્સોને ઝડપી લેવામાં આવ્યા હતા.
પોલીસે પકડેલા આરોપીઓમાં જયદીપગર દયાગર અપારનાથી, ઉંમર ૨૭ વર્ષ, રહે. રોજીવાડા, તા. પોરબંદર, જિ. પોરબંદર, જયેશભાઈ રામાભાઈ કરાવદરા, ઉંમર ૨૦ વર્ષ, રહે. રોજીવાડા, તા. પોરબંદર, જિ. પોરબંદર તથા ત્રીજા આરોપીની સંડોવણી સામે આવી છે. ફરિયાદમાં દર્શાવ્યા મુજબ આરોપીઓ પોરબંદર જિલ્લાના રહેવાસી છે.
પોલીસની તપાસ દરમિયાન મળી આવેલો ગાંજો અલગથી કાઢી તેનું વજન કરવામાં આવ્યું હતું. ગાંજાનું કુલ વજન ૨ કિલો થયું હતું, જેની કિંમત આશરે રૂ.૧,૦૦,૦૦૦ ગણવામાં આવી છે. ગાંજો કબજે લઈ તેના નમૂના તૈયાર કરી આગળની કાયદેસરની કાર્યવાહી હાથ ધરવામાં આવી છે.
ગાંજા ઉપરાંત પોલીસે આરોપીઓ પાસેથી બે મોબાઇલ ફોન કબજે કર્યા છે, જેની કુલ કિંમત રૂ.૩૪,૦૦૦ દર્શાવવામાં આવી છે. આ ઉપરાંત ગુનામાં ઉપયોગમાં લેવાયેલી વર્ના કારની કિંમત રૂ.૩ લાખ ગણવામાં આવી છે. આમ, ગાંજા, બે મોબાઇલ ફોન અને કાર સહિત કુલ રૂ.૪,૩૪,૦૦૦નો મુદ્દામાલ પોલીસે કબજે કર્યો છે.
આ સમગ્ર મામલે ધ્રોલ પોલીસ સ્ટેશનમાં એન.ડી.પી.એસ. એક્ટની કલમ ૮(સી), ૨૦(બી)(૨)(બી) અને ૨૯ મુજબ ગુનો નોંધવામાં આવ્યો છે. પોલીસ દ્વારા બન્ને આરોપીઓને કબજામાં લઈ ગાંજો ક્યાંથી મેળવ્યો હતો, કોને પહોંચાડવાનો હતો તથા સમગ્ર નશીલા પદાર્થના નેટવર્ક અંગે તપાસ શરૂ કરવામાં આવી છે. ઉપરાંત પોરબંદરના એક ત્રીજા શખ્સની પણ સંડોવણી હોવાનું જાણવા મળી રહ્યું છે
ફરિયાદમાં દર્શાવ્યા મુજબ આરોપીઓ પાસેથી મળેલા ગાંજાની કાયદેસરની તપાસ માટે નમૂનાઓ લેવામાં આવ્યા છે અને કબજે કરાયેલા મુદ્દામાલને સીલ કરવાની કાર્યવાહી કરવામાં આવી છે. કેસની વધુ તપાસ ધ્રોલ પોલીસ સ્ટેશનના પોલીસ ઇન્સ્પેક્ટર દ્વારા હાથ ધરવામાં આવી રહી છે.
