Ahmedabad,તા.૩૦
અમદાવાદ કસ્ટમ્સના એર ઈન્ટેલિજન્સ યુનિટ દ્વારા ડ્રગ્સની હેરાફેરી સામે મોટી કાર્યવાહી કરવામાં આવી છે. બેંગકોકથી અમદાવાદ આવેલા એક મુસાફર પાસેથી ૯૭૩.૨૩ ગ્રામ ગાંજો જપ્ત કરવામાં આવ્યો છે. આ મામલે મુસાફરની ધરપકડ કરીને વધુ તપાસ હાથ ધરવામાં આવી છે. આ વ્યક્તિ સુરતનો રહેવાસી છે. જે ૩૦ નાના પેકેટમાં આ ગાંજો લાવી રહ્યો હતો.
કસ્ટમ્સ અધિકારીઓને એપીઆઇએસ પ્રોફાઇલિંગના આધારે મુસાફર અંગે શંકા જતા તેની તપાસ કરવામાં આવી હતી. સુરતના રહેવાસી આ મુસાફર ૨૯ સપ્ટેમ્બર, ૨૦૨૬ના રોજ બેંગકોકથી ફ્લાઇટ નંબ ટીજી -૩૪૩ મારફતે અમદાવાદ એરપોર્ટ પર પહોંચ્યો હતો.
મુસાફરના કેબિન બેગેજમાં રહેલી એક પેપર કેરી બેગની તપાસ દરમિયાન બે પ્લાસ્ટિક પેકેટ મળી આવ્યા હતા. આ બંને પ્લાસ્ટિક પેકેટની અંદર કુલ ૩૦ નાના પ્રિન્ટેડ પેકેટ રાખવામાં આવ્યા હતા. પેકેટ પર ‘ડિહાઇડ્રેટેડ ગ્વાવા’ લખવામાં આવ્યું હતું.
અધિકારીઓને પેકેટોમાં રહેલા લીલા રંગના પદાર્થ અંગે શંકા જતા એનડીપીએસ ફીલ્ડ ટેસ્ટ કિટથી પ્રાથમિક તપાસ કરવામાં આવી હતી. તપાસ દરમિયાન પદાર્થ ગાંજો એટલે કે મેરિજુઆના હોવાનું પ્રાથમિક રીતે સામે આવ્યું હતું. જપ્ત કરાયેલા ગાંજાનું કુલ વજન ૯૭૩.૨૩ ગ્રામ હોવાનું કસ્ટમ્સે જણાવ્યું છે.
કસ્ટમ્સ દ્વારા જપ્ત કરાયેલા પ્રતિબંધિત પદાર્થને એનડીપીએસ એક્ટ, ૧૯૮૫ની જોગવાઈઓ હેઠળ સીઝ કરવામાં આવ્યો છે. સાથે જ મુસાફરની ધરપકડ કરવામાં આવી છે. સમગ્ર મામલે ગાંજો ક્યાંથી મેળવવામાં આવ્યો હતો અને કોને પહોંચાડવાનો હતો તે સહિતના મુદ્દે અમદાવાદ કસ્ટમ્સ દ્વારા વધુ તપાસ હાથ ધરવામાં આવી છે.
