(નયના દવે દ્વારા)
Jamnagar તા.૩૦
Jamnagar નજીક લોડ્ર્સ હોટલ પાસે જાહેર માર્ગ પર દારૂના નશામાં ટ્રક ચલાવતા એક ચાલકને જનરક્ષક-૧૧૨ની મદદથી ઝડપી પાડવામાં આવ્યો હતો. પોલીસે તેની સામે મોટર વાહન અધિનિયમની કલમ ૧૮૫ તથા ગુજરાત પ્રોહિબિશન અધિનિયમની કલમ ૬૬(૧)(બી) હેઠળ ગુનો નોંધી કાયદેસરની કાર્યવાહી હાથ ધરી છે.
ફરિયાદ મુજબ ખંભાળિયાના સાકેત હોસ્પિટલ પાસે રહેતા અને ડ્રાઇવિંગનો વ્યવસાય કરતા ભરતભાઈ ગોરધનભાઈ રાઠોડ કચ્છના કબરાઉથી દ્વારકા તરફ જઈ રહ્યા હતા. તે દરમિયાન જામનગર નજીક લોડ્ર્સ હોટલ પાસે ઉત્તર પ્રદેશના પાસિંગ યુ. પી. -૧૫ ઇ.ટી. ૯૨૭૩ ની ટ્રક બેદરકારીથી તેમની બોલેરો નજીકથી પસાર થતાં તેમણે ટ્રક રોકાવી હતી.
ટ્રક ચાલક વિકાસકુમાર હરિશંકરસિંહ પટેલ (ઉ.વ. ૩૬), રહે. અંકોરહા, થાણા-દિનારા, જિલ્લો રોહતાસ (બિહાર) દારૂના નશામાં હોવાનું જણાતા ભરતભાઈએ જનરક્ષક-૧૧૨ને જાણ કરી હતી. જનરક્ષક-૧૧૨ના ઇન્ચાર્જ એ.એસ.આઈ. એસ. એચ. જીલરીયા સ્થળે પહોંચ્યા બાદ બંનેને પોલીસ સ્ટેશન લઈ જવાયા હતા.
પોલીસ તપાસ દરમિયાન વિકાસકુમાર પટેલના મોઢામાંથી કેફી પીણાની તીવ્ર વાસ આવતી હતી, આંખો લાલ હતી અને શરીરનું સમતોલપણું જાળવી શકતો ન હોવાથી તે નશામાં હોવાનું જણાયું હતું. તેની પાસે દારૂ પીવા અંગેનું કોઈ પાસ-પરમિટ પણ ન હોવાનું સામે આવ્યું હતું. પોલીસે ટ્રકનો કબજો તેના મિત્ર અને ડ્રાઇવર ફૈઝ મહંમદ વૈઝ મહંમદ ગુર્જરને સોંપી આપ્યો હતો. ત્યારબાદ ટ્રક ચાલક વિકાસકુમાર પટેલ સામે એમ.વી. એક્ટની કલમ ૧૮૫ તથા પ્રોહિબિશન એક્ટની કલમ ૬૬(૧)(બી) હેઠળ ગુનો નોંધી આગળની કાર્યવાહી હાથ ધરવામાં આવી છે.
