સુદાનમાં ચાલી રહેલા ગૃહયુદ્ધને કારણે સોનાનું ઉત્ખનન વધ્યું છે, જેની મોટા પાયે ઇજિપ્તમાં તસ્કરી થાય છે
Sudan, તા.૧૨
ઉત્તર સુદાનમાં સોનાની ખાણો પર થયેલા ભીષણ હવાઈ હુમલામાં ઓછામાં ઓછા ૭૨ શ્રમિકોના દર્દનાક મોત થયા છે. સ્થાનિક માનવાધિકાર સંગઠન ’ઇમરજન્સી લોયર્સ’ અનુસાર, આ હવાઈ હુમલામાં નાના પાયે સોનાનું ઉત્ખનન કરતા ગરીબ શ્રમિકો નિશાન બન્યા છે. છેલ્લા કેટલાક મહિનાઓમાં આ વિસ્તારમાં બનેલી આ બીજી મોટી ગોઝારી ઘટના છે.
માનવાધિકાર સંસ્થાએ આ હવાઈ હુમલા માટે ઈજિપ્તની વાયુસેનાને જવાબદાર ઠેરવી છે. સંસ્થાનું કહેવું છે કે સરહદ પારથી કરવામાં આવેલો આ પ્રકારનો હુમલો આંતરરાષ્ટ્રીય કાયદાઓનો સ્પષ્ટ અનાદર અને ઉલ્લંઘન છે. જોકે, ઈજિપ્તની સેના કે વિદેશ મંત્રાલય દ્વારા આ મામલે હજુ સુધી કોઈ સત્તાવાર ટિપ્પણી કરવામાં આવી નથી. સોશિયલ મીડિયા પર સામે આવેલા ભયાનક દ્રશ્યોમાં ખાણના કાટમાળ વચ્ચે અનેક મૃતદેહો વિખરાયેલા જોવા મળ્યા હતા.
સુદાનમાં સેના અને અર્ધસૈનિક દળો વચ્ચે ચાલી રહેલા ભીષણ ગૃહયુદ્ધના કારણે લોકોની આજીવિકાના અન્ય તમામ સાધનો ઠપ થઈ ગયા છે. જેના પરિણામે ઉત્તરી સુદાનમાં અસ્થાયી રૂપે સોનાનું ઉત્ખનન કરતા શ્રમિકોની સંખ્યામાં મોટો ઉછાળો આવ્યો છે. બંને સંઘર્ષરત જૂથો માટે સોનું રોકડ કમાવવાનો મુખ્ય સ્ત્રોત બની ગયું છે અને નિષ્ણાતોના મતે આ સોનાનો મોટો જથ્થો ઈજિપ્તમાં ગેરકાયદેસર રીતે તસ્કરી કરીને મોકલવામાં આવે છે.
સુદાનમાં વધી રહેલા ગૃહયુદ્ધમાં હવે ડ્રોન અને હવાઈ હુમલાઓ પ્રાથમિક હથિયાર બની ગયા છે, જેના કારણે સામાન્ય નાગરિકોના મોટા પાયે મોત થઈ રહ્યા છે. સંયુક્ત રાષ્ટ્ર (ેંદ્ગ) ના અહેવાલ મુજબ, આ અગાઉ શુક્રવારે પણ સુદાનના બ્લુ નાઈલ રાજ્યમાં વિસ્થાપિતોના એક કેમ્પ પર થયેલા ડ્રોન હુમલામાં ૩૧ નિર્દોષ લોકોએ જીવ ગુમાવ્યો હતો.
