Paris,તા. 24
જે યુરોપ ખંડ પોતાની ઠંડી હવાઓ, બરફવર્ષા અને ખુશનુમાં હવામાન માટે દુનિયાભરમાં જાણીતો હતો, તે આજે અચાનક એક સળગતી ભઠ્ઠીમાં ફેરવાઈ ગયું છે. વર્ષ 2026ની શરૂઆતે જ સમગ્ર વિશ્વને બતાવી દીધું છે કે ગ્લોબલ વોર્મિંગ હવે કોઈ ભવિષ્યની ચેતવણી નથી, પરંતુ એક વર્તમાનની ભયાનક ઘટના બની ચૂકી છે.
હાલમાં યુરોપનાં 26 દેશો આ અસહ્ય ગરમીનો સામનો કરી રહ્યાં છે, જેમાંથી ફ્રાન્સ, સ્પેન અને બ્રિટન સહિત 15 દેશોમાં ગરમીને લઈને `રેડ એલર્ટ’ જાહેર કરવામાં આવ્યું છે.
આ મોટાભાગનાં દેશોમાં તાપમાન 40 થી 43 ડિગ્રી સેલ્સિયસ સુધી પહોંચી ગયું છે અથવા તેની નજીક છે. વિશ્વ હવામાન સંસ્થા (WMO) ના જણાવ્યાં અનુસાર, યુરોપ પૃથ્વી પર સૌથી ઝડપથી ગરમ થઈ રહેલો ખંડ છે, જે વૈશ્વિક સરેરાશ કરતાં બમણી ઝડપે ગરમ થઈ રહ્યો છે.
ફ્રાન્સમાં `કેનિકલ’નો કહેર : 1947 પછીની સૌથી ગરમ રાત અને ન્યુક્લિયર પ્લાન્ટ બંધ
ફ્રાન્સમાં આ ભીષણ હીટવેવને સ્થાનિક ભાષામાં `કેનિકલ’ કહેવામાં આવે છે. દેશનાં 90થી વધુ વિભાગોમાંથી 60થી વધુ વિસ્તારોમાં `રેડ એલર્ટ’ લાગું કરી દેવાયું છે. પેરિસ અને બોર્ડો જેવાં શહેરોમાં તાપમાન 42 થી 43 ડિગ્રી સુધી પહોંચી ગયું છે.
ફ્રાન્સની હવામાન એજન્સી `મેટિયો-ફ્રાન્સ’ ના જણાવ્યાં અનુસાર, સોમવારની રાત દેશમાં વર્ષ 1947 પછીની (જ્યારથી હવામાનનો રેકોર્ડ રાખવાનું શરૂ થયું) સૌથી ગરમ રાત નોંધાઈ છે. ગરમીની ભયાનકતાને જોતા પેરિસના મેયર એન હિડાલગોએ લોકોને રાહત આપવા માટે શહેરનાં તમામ સાર્વજનિક પાર્ક 24 કલાક ખુલ્લા રાખવાનો આદેશ આપ્યો છે.
આ સાથે જ એફિલ ટાવર અને લુવ્ર મ્યુઝિયમ જેવા પ્રવાસી સ્થળો પર `મિસ્ટિંગ સ્ટેશન’ એટલે કે પાણીનો છંટકાવ કરતા મશીનો લગાવવામાં આવ્યાં છે. ગરમીનાં પ્રકોપના કારણે સોમવારે રાત્રે ફ્રાન્સનો `ગોલફેશ ન્યુક્લિયર પાવર પ્લાન્ટ’ બંધ કરવો પડ્યો હતો, કારણ કે પ્લાન્ટને ઠંડો રાખવા માટે વપરાતી ગારોન નદીનું તાપમાન 28 ડિગ્રી સુધી પહોંચવાની આશંકા હતી.
`ટ્રોપિકલ નાઇટ્સ’નો નવો ખતરો અને નદીઓમાં ડૂબી જવાથી મોત
સામાન્ય રીતે માનવ શરીરને દિવસની ગરમીમાંથી ઉગારવા માટે રાત્રિનાં તાપમાનનું નીચું હોવું જરૂરી છે. પરંતુ હાલમાં યુરોપમાં `ટ્રોપિકલ નાઇટ્સ’ની સ્થિતિ બની છે, જેમાં રાત્રે પણ તાપમાન 20 થી 25 ડિગ્રી સેલ્સિયસથી નીચે નથી જતું. રાત્રે પણ ગરમીથી રાહત ન મળવાનાં કારણે લોકોનાં હૃદય અને ફેફસાં પર ભારે દબાણ વધી રહ્યું છે, જે વૃદ્ધો, બાળકો અને બીમાર લોકો માટે જીવલેણ સાબિત થઈ શકે છે.
ગરમીથી અકળાઈને નદીઓ, તળાવો અને નહેરોમાં નાહવા પડેલાં લોકોમાંથી ફ્રાન્સમાં 40 અને જર્મનીમાં 5 લોકોના ડૂબી જવાથી મોત થયાં છે. જર્મનીમાં બવેરિયાની નદીમાં 2 યુવકો અને બાલ્ટિક સાગરમાં એક મહિલાએ જીવ ગુમાવ્યો છે.
આ ઉપરાંત અતિશય ગરમીમાં સ્વાસ્થ્યના જોખમને ટાળવા માટે ફ્રાન્સનાં વાર્ષિક મ્યુઝિક ફેસ્ટિવલ `ફતે દ લા મ્યુઝિક’ દરમિયાન સાર્વજનિક સ્થળોએ દારૂ પીવા પર પણ પ્રતિબંધ લાદવામાં આવ્યો છે તથા દેશભરમાં 1,350થી વધુ શાળાઓ બંધ કરાઈ છે.
બ્રિટનમાં 50 વર્ષ જૂનો રેકોર્ડ તૂટવાની આશંકા
બ્રિટનનાં હવામાન વિભાગનાં જણાવ્યાં અનુસાર, આજે તાપમાન 39 ડિગ્રી સેલ્સિયસને પાર કરી શકે છે. જો આવું થશે તો જૂન મહિનાનો 1976નો (50 વર્ષ જૂનો) 35.6 ડિગ્રીનો રાષ્ટ્રીય રેકોર્ડ તૂટી જશે.
હવામાન વિભાગે આજે અને ગુરુવાર માટે `રેડ એક્સ્ટ્રીમ હીટ વોર્નિંગ’ જારી કરી છે, જે લોકોનાં સ્વાસ્થ્ય, વાહનોનાં પરિવહન અને જરૂરી સેવાઓ ખોરવવા માટેની ચેતવણી છે. હવામાં ભેજનું પ્રમાણ વધુ હોવાથી ગરમીનું જોખમ વધુ અનુભવાશે અને બ્રિટનમાં પણ રાત્રિનું તાપમાન 20 ડિગ્રીથી નીચે ન જવાની ટ્રોપિકલ નાઇટ્સની આશંકા છે.
ઇટાલી અને સ્પેન : પ્રવાસીઓ માટે `એન્ડ્યોરન્સ ટેસ્ટ’ અને જંગલોમાં આગ
રોમ અને સ્પેનમાં તાપમાન 40 ડિગ્રીની આસપાસ પહોંચતાં અહીં ફરવા આવેલાં પ્રવાસીઓ માટે આ ગરમી એક `એન્ડ્યોરન્સ ટેસ્ટ’ એટલે કે સહનશક્તિની પરીક્ષા બની ગઈ છે. રોમમાં પ્રખ્યાત કોલોસિયમની બહાર પ્રવાસીઓ લાંબી કતારોમાં ગરમીથી બેહાલ થઈ રહ્યાં છે અને બચવા માટે પેન્થિઓન એટલે કે પ્રાચીન મંદિર જેવી પથ્થરોની જૂની ઇમારતોમાં આશરો લઈ રહ્યાં છે જે અંદરથી થોડી ઠંડી હોય છે.
સ્પેનમાં ગરમ પવનો અને સૂકા હવામાનના કારણે જંગલોમાં આગ લાગવાનું `રેડ એલર્ટ’ જાહેર કરાયું છે. રોમ શહેરમાં નવી ઇલેક્ટ્રિક બસોના એર કંડિશનર સતત ચાલું રાખવા પડતાં હોવાથી તેની બેટરીઓ પણ ઝડપથી ખતમ થઈ રહી છે. બેલ્જિયમમાં પણ ગરમીનાં કારણે ઘણી શાળાઓમાં અડધાં દિવસનું શિક્ષણ શરૂ કરી દેવાયું છે.
