ભૂકંપના જોખમને રીતે અત્યંત જોખમી ગણાતા ઝોન ૫માં સમાવિષ્ટ કચ્છમાં ફરીથી ધરા ધ્રુજી છે
Kutch, તા.૨૪
કચ્છમાં ફરીથી ભૂકંપનો આંચકો નોંધાયો છે. આ આંચકો કચ્છના ભચાઉથી ૨૧ કિલોમીટર દૂર નોંધાયો. રાત્રે લગભગ ૧.૩૦ કલાકની આસપાસ આ ભૂકંપ આવ્યો. ભૂકંપની ઊંડાઈ ૧૫.૩ કિલોમીટર નોંધાઈ હતી. મોડી રાતે લગભગ દોઢ વાગ્યાની આસપાસ ૩.૩ની તીવ્રતાનો આંચકો નોંધાયો. કચ્છમાં આવેલા ભૂકંપનું કેન્દ્રબિન્દુ ભચાઉથી ૨૧ કિલોમીટર દૂર પૂર્વ દક્ષિણ પૂર્વ દિશામાં હતું. તમને જણાવી દઈએ કે જે સત્તાવાર માહિતી ઉપલબ્ધ છે તે પ્રમાણે ગુજરાતના કચ્છનો રણપ્રદેશ જે ભૂકંપને લઈને અત્યંત જોખમી પ્રદેશ ગણાય તેવા ઝોન ૫માં આવે છે. જ્યારે કેટલાક અન્ય વિસ્તારો ઝોન ૪ અને મોટાભાગના વિસ્તારો ઝોન ૩માં આવે છે. સરકારી યાદીની માહિતી મુજબ અમદાવાદ ઝોન ૩માં આવે છે.
ભારત ભૂકંપના ખતરાની રીતે પાંચ ઝોનમાં વહેંચાયેલું છે. જેમાં પાંચમો ઝોન એ ખુબ જ જોખમી ગણાય છે. ઝોન પ્રમાણે માહિતી જાણીએ.
ઝોન ૫ અત્યંત જોખમી : આ ઝોનમાં કાશ્મીર હિમાલયના કેટલાક વિસ્તારો, ઉત્તર પૂર્વ ભારત, ઉત્તર બિહાર, કચ્છનું રણ સહિત મોટાભાગના વિસ્તારો અને આંદમાન નિકોબાર જેવા વિસ્તારોનો સમાવેશ કરાયેલો છે.
ઝોન ૪ જેમાં જોખમનું પ્રમાણે વધુ : આ ઝોનમાં પણ હિમાલયના કેટલાક ભાગો, દિલ્હી તથા ઉત્તર ભારતના કેટલાક વિસ્તારો અને ગુજરાતના પણ કેટલાક વિસ્તારો જેમ કે ઉત્તર સૌરાષ્ટ્ર, કચ્છને અડીને આવેલા વિસ્તારો તથા આજુબાજુના વિસ્તારોનો સમાવેશ થાય છે.
ઝોન ૩ જોખમનું પ્રમાણે સરખામણીમાં ઓછું : ગુજરાતના મોટાભાગના વિસ્તારો જેમાં અમદાવાદ સહિત અનેક શહેરોનો પણ સમાવેશ થાય છે તથા અનેક મધ્ય અને દક્ષિણ ભારતીય વિસ્તારોનો આ ઝોનમાં સમાવેશ થાય છે.
ઝોન ૨માં પ્રમાણ ઓછું : આ ઝોનમાં દેશના બાકીના વિસ્તારોમાંથી મોટાભાગના વિસ્તારો આવે છે. જેમાં ભૂકંપના જોખમનું પ્રમાણ ખુબ ઓછું હોય છે. અત્રે નોંધનીય છે કે ભૂકંપના જોખમની રીતે જોઈએ તો કચ્છ ભારતના સૌથી સક્રિય ભૂકંપીય વિસ્તારોમાંથી એક છે. ૨૦૨૬માં પણ કચ્છમાં હળવા ભૂકંપના આંચકા નોંધાયેલા છે. ૧૬ જુલાઈએ ૩.૪ અને ૧ મેના રોજ ૩.૨નો આંચકો નોંધાયેલો હતો.
