અફવાઓથી દૂર રહો, સત્તાવાર સૂચનાઓનું પાલન કરો અને આગામી ૨૪ કલાક સુધી સંપૂર્ણ સાવચેતી રાખો
Surat,તા.૨૩
સુરત સહિત ગુજરાતના ૧૧ જિલ્લાઓમાં ગુરુવારે બપોરે લાખો મોબાઇલ ફોન પર અચાનક ઇમરજન્સી સેલ બ્રોડકાસ્ટ એલર્ટ ફ્લેશ થતાં લોકોમાં થોડા સમય માટે ગભરાટ અને આશ્ચર્યનો માહોલ સર્જાયો હતો. છેલ્લા કેટલાક દિવસોથી ભારે વરસાદ અને પૂર જેવી સ્થિતિનો સામનો કરી રહેલા વિસ્તારોમાં આ એલર્ટ મળતાં લોકોમાં ચિંતા વધુ વધી ગઈ હતી. બાદમાં જાણવા મળ્યું કે રાજ્ય આપત્તિ વ્યવસ્થાપન સત્તામંડળ દ્વારા આગામી ૨૪ કલાક દરમિયાન અતિભારે વરસાદની સંભાવનાને ધ્યાનમાં રાખીને આ ચેતવણી મોકલવામાં આવી હતી.આ ઇમરજન્સી એલર્ટ સામાન્ય એસએમએસથી અલગ સેલ બ્રોડકાસ્ટ ટેક્નોલોજી દ્વારા મોકલવામાં આવ્યું હતું. મોબાઇલની સ્ક્રીન પર મોટા પોપ-અપ સાથે વિશેષ એલર્ટ ટોન વાગતાં ઘણા લોકોને શરૂઆતમાં કોઈ મોટી આપત્તિ સર્જાઈ હોવાની આશંકા થઈ હતી. થોડા જ સમયમાં આ સંદેશ સોશિયલ મીડિયા પર વાયરલ થઈ ગયો અને લોકો એકબીજાને ફોન કરીને પણ માહિતી મેળવતા જોવા મળ્યા હતા.
રાજ્ય આપત્તિ વ્યવસ્થાપન સત્તામંડળે સુરત ઉપરાંત ભરૂચ, નર્મદા, નવસારી, વલસાડ, તાપી, ડાંગ, વડોદરા, છોટાઉદેપુર, દાહોદ અને પંચમહાલ જિલ્લામાં આગામી ૨૪ કલાક દરમિયાન છૂટાછવાયા સ્થળોએ અતિભારે વરસાદની શક્યતા વ્યક્ત કરી છે. સાથે જ નાગરિકોને બિનજરૂરી મુસાફરી ટાળવા, નીચાણવાળા વિસ્તારોમાં સાવચેતી રાખવા અને સ્થાનિક વહીવટી તંત્રની સૂચનાઓનું પાલન કરવાની અપીલ કરવામાં આવી છે.
સુરતમાં છેલ્લા કેટલાક દિવસોથી સતત વરસેલા વરસાદના કારણે અનેક ખાડીઓ ઓવરફ્લો થઈ છે અને શહેરના અનેક નીચાણવાળા વિસ્તારોમાં પાણી ભરાવાની સ્થિતિ સર્જાઈ છે. અનેક પરિવારો હજુ પણ આ અસરમાંથી બહાર આવવાનો પ્રયાસ કરી રહ્યા છે. આવી સ્થિતિમાં ફરી એકવાર અતિભારે વરસાદની આગાહીએ લોકોની ચિંતામાં વધારો કર્યો છે.
શહેરભરમાં આ એલર્ટ દિવસનો સૌથી ચર્ચાસ્પદ વિષય બની ગયો હતો. ઓફિસો, વેપારી સંસ્થાઓ, રહેણાંક સોસાયટીઓ અને જાહેર સ્થળોએ લોકો પોતાના મોબાઇલમાં આવેલા સંદેશ એકબીજાને બતાવતા જોવા મળ્યા હતા. સોશિયલ મીડિયા પર પણ એલર્ટના સ્ક્રીનશોટ અને વીડિયો ઝડપથી વાયરલ થયા હતા. ઘણા લોકોએ જણાવ્યું કે તેમના મોબાઇલમાં આ પ્રકારનો ઇમરજન્સી એલર્ટ પ્રથમ વખત આવ્યો હતો.
નિષ્ણાતોના જણાવ્યા મુજબ સેલ બ્રોડકાસ્ટ એલર્ટ આપત્તિ પહેલાં લોકોને ઝડપથી ચેતવણી પહોંચાડવાની અત્યંત અસરકારક વ્યવસ્થા છે. આ સિસ્ટમ દ્વારા એકસાથે લાખો મોબાઇલ પર સંદેશ મોકલી શકાય છે, જેથી જોખમવાળા વિસ્તારોના લોકો સમયસર સાવચેત થઈ શકે.
