Junagadh,તા.21
એશિયામાં એકમાત્ર સિંહોના વસવાટ સમાન ગીરના તથા આસપાસના ક્ષેત્રોમાં સિંહોની વસતિ વધતી રહી છે તથા રાજય સરકાર દ્વારા પણ સિંહોની સલામતી સામે પ્રવાસનને પણ પ્રોત્સાહન મળે તે ખાસ જોવામાં આવી રહી છે.
તે સમયે ગીર અભ્યારણ- સફારીમાં સરકાર વધુ વિસ્તારોને આવરી લઈને ચાર નવા રૂટ પણ શરુ કરવા તૈયારી કરી રહી છે. એક તરફ અભ્યારણના પ્રવાસીઓ વધતા જાય છે અને તેના કારણે હજારો સહેલાણીઓને રાહ જોવી પડે છે તેમાં હાલના 13 સફારી રૂટ છે તેમાં નવા ચારના ઉમેરાથી સેંકડો સહેલાણીઓ ગીર સફારીનો લાભ ઉઠાવી શકશે તેવા સંકેત છે.
આ અંગે ગાંધીનગરમાં જંગલ વિભાગના એક સીનીયર અધિકારીના જણાવ્યા મુજબ હાલ ગીરના અભ્યારણના 1412 સ્કવેર કિ.મી.ના ક્ષેત્રમાં 8% જેમાં ગીર નેશનલ પાર્કનો 258 સ્કવેર કિ.મી.નો એરીયા પણ આવી જાય છે તે સફારી માટે ખુલ્લો છે. પણ સહેલાણીઓના ધસારાને પહોંચી વળવા તે પુરતો નથી અને જેઓને પરમીટ મળતી નથી તેમાં પછી અમરેલી સહિતના ક્ષેત્રમાં સિંહોના ગેરકાનુની દર્શન જેવી વ્યવસ્થામાં સામેલ થાય છે.
હવે વધુ 4 સફારી રૂટ ખોલવાની તૈયારી છે જેની રોજ કુલ 280 પરમીટ આપી શકાશે. જે હાલ 180 પરમીટ જ આપી શકાય છે. આ કારણે મોટી સંખ્યામાં પ્રવાસીઓને પરત જવું પડે છે.
પ્રિન્સીપાલ ચીફ ક્નઝર્વટર ઓફ ફોરેસ્ટના જણાવ્યા મુજબ નિયમ પ્રમાણે સફારીના 20% ક્ષેત્રની ટુરીઝમ પ્રવૃતિ માટે ઉપયોગમાં લઈ શકાય છે. હાલ ફકત 8%નો જ ઉપયોગ થાય છે તેની 12% સ્પેસનો ઉપયોગ તબકકાવાર વધારાશે.

