ચાર સ્થળોએ ૨૫ પુરુષ અને પાંચ મહિલાઓ સામે કાર્યવાહી; રૂ. ૯૭,૦૨૦ની રોકડ, ૧૫૬ ગંજીપત્તાના પાના અને ઘોડીપાસાના બે પાસા કબજે
(નયના દવે દ્વારા)
Jamnagar તા.૩
જામનગર શહેર અને જિલ્લામાં જુગારની પ્રવૃત્તિઓ સામે પોલીસની ઝુંબેશ વધુ તેજ બનતી જઈ રહી છે. છેલ્લા એક જ દિવસમાં શહેર અને જિલ્લાના ચાર અલગ-અલગ સ્થળોએ પોલીસ દ્વારા દરોડા પાડીને ૨૫ પુરુષ અને પાંચ મહિલાઓ સહિત કુલ ૩૦ જુગારીઓને ઝડપી પાડવામાં આવ્યા હતા. ચારેય કાર્યવાહીમાં પોલીસે કુલ રૂ. ૯૭,૦૨૦ની રોકડ, ગંજીપત્તાના ૧૫૬ પાના તેમજ ઘોડીપાસાના બે પાસા કબજે કરી તમામ સામે જુગારધારા કલમ ૧૨ હેઠળ ગુના નોંધી આગળની કાયદેસરની કાર્યવાહી હાથ ધરી છે.
જામજોધપુર પોલીસ સ્ટેશનના સ્ટાફે ગીંગણી ગામે પેટ્રોલ પંપ નજીક પીપળાના ઝાડ નીચે જાહેરમાં ચાલતા તીનપત્તી (રોન પોલીસ) જુગાર પર દરોડો પાડી વલભભાઈ સવજીભાઈ સાપરીયા, નિલેશભાઈ પ્રવીણભાઈ ડાભી, ગોવિંદભાઈ મગનભાઈ ડોડવાડિયા, ભુપતભાઈ ગોવિંદભાઈ ડાભી, અશ્વિનગીરી દોલતગીરી ગોસાઈ અને રાજનભાઈ મેઘજીભાઈ વાંરસકિયાને ઝડપી પાડ્યા હતા. સ્થળ પરથી રૂ. ૧૩,૭૮૦ની રોકડ અને ગંજીપત્તાના ૫૨ પાના કબજે કરવામાં આવ્યા હતા. વરિષ્ઠ નાગરિક આરોપીને બી.એન.એસ.એસ. કલમ ૩૫(૩) મુજબ નોટિસ આપવામાં આવી હતી, જ્યારે અન્ય આરોપીઓની અટકાયત કરી વધુ તપાસ હાથ ધરાઈ છે.
જામનગર શહેરના પંચકોશી એ ડિવિઝન પોલીસ સ્ટેશને હાપા યોગેશ્વરધામ વિસ્તારમાં જાહેરમાં તીનપત્તી (રોન પોલીસ) જુગાર રમાતો હોવાની બાતમીના આધારે દરોડો પાડી નવ જુગારીઓને ઝડપી પાડ્યા હતા. પોલીસે રૂ. ૪૧,૪૮૦ની રોકડ અને ગંજીપત્તાના ૫૨ પાના કબજે કરી તમામ સામે જુગારધારા હેઠળ કાર્યવાહી હાથ ધરી હતી.
આ ઉપરાંત સીટી બી ડિવિઝન પોલીસ સ્ટેશનના સર્વેલન્સ સ્કોડે કે.પી. શાહની વાડી, ચાર ચોક વિસ્તારમાં ઘોડીપાસાના પાસા વડે પૈસાની હારજીતનો જુગાર રમાતો હોવાની ખાનગી બાતમીના આધારે દરોડો પાડી છ જુગારીઓને ઝડપી લીધા હતા. પોલીસે રૂ. ૨૭,૯૫૦ની રોકડ અને ઘોડીપાસાના બે પાસા કબજે કર્યા હતા. તમામ આરોપીઓને બી.એન.એસ.એસ. કલમ ૩૫(૩)(૧) મુજબ નોટિસ આપી જુગારધારા હેઠળ કાર્યવાહી હાથ ધરવામાં આવી છે.
બેડી મરીન પોલીસ સ્ટેશનના સ્ટાફે વિભાપર ગામની મધુરમ સોસાયટીમાં જાહેરમાં તીનપત્તી (રોન પોલીસ) જુગાર રમાતો હોવાની બાતમીના આધારે દરોડો પાડી ચાર પુરુષ અને પાંચ મહિલાઓ સહિત કુલ નવ જુગારીઓને ઝડપી પાડ્યા હતા. પોલીસે મુકેશભાઈ ધવલભાઈ મેહતા, યોગેશગીરી જગદીશગીરી ગોસાઈ, રાજેશભાઈ રામનાથભાઈ કંથળ, ભરતસિંહ ઉમેદસિંહ વાઘેલા, ગીતાબેન ધવલભાઈ મેહતા, રાધિકાબેન રમેશભાઈ લાઠીયા, શાંતિબેન હિતેષભાઈ પરમાર, પ્રિયંકાબેન રાજેશભાઈ કંથળ અને કંચનબેન રમેશભાઈ સચદેવ સામે કાર્યવાહી કરી હતી. સ્થળ પરથી રૂ. ૧૩,૮૧૦ની રોકડ અને ગંજીપત્તાના ૫૨ પાના કબજે કરવામાં આવ્યા હતા. તમામ આરોપીઓને ભારતીય નાગરિક સુરક્ષા સંહિતા કલમ ૩૫(૩) મુજબ નોટિસ આપી મુક્ત કરવામાં આવ્યા હતા, જ્યારે તેમની સામે જુગારધારા કલમ ૧૨ હેઠળ ગુનો નોંધી વધુ તપાસ હાથ ધરવામાં આવી છે.
