Surat,તા.૨૬
શહેરમાં છેતરપિંડીના કેસમાં પાલ પોલીસ સ્ટેશનને મોટી સફળતા મળી છે. વિઝા અને વર્ક પરમિટ અપાવવાના બહાને લોકો સાથે લાખો રૂપિયાની છેતરપિંડી કરનાર આરોપીને ઉત્તર પ્રદેશના નોઇડા ખાતેથી ઝડપી પાડવામાં આવ્યો છે. ટેકનિકલ સર્વેલન્સ અને ચોક્કસ બાતમીના આધારે કરવામાં આવેલી આ કામગીરીને પોલીસ માટે મહત્વપૂર્ણ સિદ્ધિ માનવામાં આવી રહી છે.
પોલીસ પાસેથી મળતી માહિતી મુજબ, સુરત શહેરમાં વિઝા અને વર્ક પરમિટ અપાવવાની લાલચ આપીને લોકોને ભોળવીને પૈસા વસૂલવાની ફરિયાદો મળી રહી હતી. આ મામલે પાલ પોલીસ સ્ટેશનમાં ગુનો નોંધાતા તપાસનો દોર શરૂ કરવામાં આવ્યો હતો. પોલીસ કમિશનર અને ઉચ્ચ અધિકારીઓના માર્ગદર્શન હેઠળ ખાસ ટીમ બનાવી આરોપીની શોધખોળ હાથ ધરવામાં આવી હતી.
આ તપાસ દરમિયાન ટેકનિકલ સોર્સિસની મદદથી આરોપીનો લોકેશન ટ્રેસ કરવામાં આવ્યો હતો, જે ઉત્તર પ્રદેશના નોઇડામાં હોવાનો ખુલાસો થયો હતો. ત્યારબાદ પોલીસ ઇન્સ્પેક્ટર એસ.એ. શાહના નેતૃત્વમાં ટીમ નોઇડા પહોંચી હતી અને આરોપીને ઝડપી પાડી કાયદેસરની કાર્યવાહી હાથ ધરવામાં આવી હતી. પકડાયેલા આરોપીની ઓળખ અંકિત ઉર્ફે અક્ષિત ઉર્ફે રાજ ઉર્ફે રોકી પટેલ (ઉંમર ૨૫) તરીકે થઈ છે. તે મૂળ ગાંધીનગર જિલ્લાના નારદીપુર ગામનો રહેવાસી છે અને હાલમાં નોઇડાના શતાબ્દી વિહાર વિસ્તારમાં રહેતો હતો. આરોપી પોતે વર્ક પરમિટ અને વિઝા સંબંધિત કામ કરતો હોવાનો દાવો કરીને લોકોનો વિશ્વાસ જીતતો અને ત્યારબાદ છેતરપિંડી આચરતો હતો.
પોલીસે આરોપી સામે ભારતીય ન્યાય સંહિતા ૨૦૨૩ની વિવિધ કલમો તેમજ આઇ.ટી. એક્ટ ૨૦૦૦ હેઠળ ગુનો નોંધ્યો છે. તપાસ દરમિયાન જાણવા મળ્યું છે કે આરોપીએ આવા પ્રકારની છેતરપિંડીના કુલ ૬ ગુનાઓ આચર્યા છે, જેને પણ પોલીસે ડિટેક્ટ કર્યા છે. આ કામગીરી દરમિયાન પોલીસ દ્વારા આરોપી પાસેથી એક એપલ કંપનીનો આઇફોન ૧૩ પ્રો (અંદાજિત કિંમત રૂ. ૩૦,૦૦૦) અને એક કી-પેડ વાળો ૈીંંઙ્મ કંપનીનો મોબાઇલ (કિંમત રૂ. ૧,૦૦૦) કબજે લેવામાં આવ્યા છે. આ મોબાઇલ ફોનનો ઉપયોગ છેતરપિંડી માટે કરવામાં આવતો હોવાનો પ્રાથમિક અંદાજ છે.
આ સમગ્ર ઓપરેશનમાં પોલીસ ઇન્સ્પેક્ટર એસ.એ. શાહ સાથે એ.એસ.આઇ. ભરતભાઈ પિયુષભાઈ, હેડ કોન્સ્ટેબલ વેલાભાઈ અજભાઈ તેમજ પોલીસ કર્મચારીઓ જિગ્નેશભાઈ પ્રવિણભાઈ અને ભાવેશકુમાર બાબલાલની ટીમે મહત્વપૂર્ણ ભૂમિકા ભજવી હતી. પોલીસ હવે આરોપીને સુરત લાવી વધુ પૂછપરછ કરી રહી છે અને તેની સામે અન્ય કોઈ ગુનાઓ નોંધાયેલા છે કે નહીં તે અંગે તપાસ ચાલુ રાખી છે. સાથે જ, પોલીસ દ્વારા લોકોને ચેતવણી આપવામાં આવી છે કે વિઝા અથવા વર્ક પરમિટ અપાવવાના બહાને કોઈ અજાણ્યા વ્યક્તિને પૈસા આપતા પહેલાં સંપૂર્ણ ચકાસણી કરવી જરૂરી છે.
આ ઘટનાએ ફરી એકવાર સાબિત કર્યું છે કે ઓનલાઈન અને વિદેશ મોકલવાની લાલચ આપતા ઠગો સામે સાવચેતી રાખવી ખૂબ જ જરૂરી છે. પોલીસ દ્વારા આવી ગતિવિધિઓ સામે કડક કાર્યવાહી ચાલુ રાખવામાં આવશે તેવી ખાતરી આપવામાં આવી છે.
