સુરત,તા.૧૪
સુરતના ડીંડોલી વિસ્તારમાં થયેલી એક યુવકની હત્યાનો ભેદ ઉકેલાઈ ગયો છે. પોલીસે બે આરોપી મિત્રોની ધરપકડ કરી છે. જ્યારે એક મુખ્ય આરોપી અતુલસિંઘ બિહારી હજુ પણ ફરાર છે. જેની ઝડપી પાડવા પોલીસે તપાસના ચક્ર ગતિમાન કર્યા છે.
મળતી માહિતી અનુસાર ગત ૧૨ માર્ચ ના રોજ ધીરજસિંઘ રાજપૂત નામના યુવકની તેના જ અંગત મિત્રો દ્વારા નિર્મમ હત્યા કરવામાં આવી હતી. સામાન્ય બોલાચાલ અને નજીવી બાબતે થયેલા ઝગડાએ એટલું ઉગ્ર સ્વરૂપ ધારણ કર્યું કે મિત્રોએ જ મિત્રનો જીવ લેતા અચકાયા નહીં. આ ઘટનાને પગલે સમગ્ર સુરત શહેરમાં ભારે ચકચાર મચી ગઈ છે અને કાયદો-વ્યવસ્થા સામે પણ સવાલો ઉભા થયા છે.
હત્યાની જાણ થતા જ ડીંડોલી પોલીસ હરકતમાં આવી હતી અને ગુનો નોંધી સઘન તપાસ હાથ ધરી હતી. ટેકનિકલ સર્વેલન્સ અને બાતમીદારોના આધારે પોલીસે આ ગુનામાં સંડોવાયેલા બે આરોપીઓની ધરપકડ કરી છે. પકડાયેલા આરોપીઓમાં શનિ ચૌહાણ અને સોનુ વર્માનો સમાવેશ થાય છે.
જોકે આ સમગ્ર હત્યાકાંડમાં અતુલસિંઘ બિહારી નામનો શખ્સ મુખ્ય સૂત્રધાર હોવાનું માનવામાં આવે છે. અતુલસિંઘ બિહારી હાલમાં પોલીસ પકડથી દૂર છે. ડીંડોલી પોલીસ દ્વારા તેને ઝડપી પાડવા માટે અલગ-અલગ ટીમો બનાવીને વિવિધ સ્થળોએ દરોડા પાડવામાં આવી રહ્યા છે. પોલીસને આશા છે કે મુખ્ય આરોપીની ધરપકડ બાદ હત્યા પાછળનું ચોક્કસ કારણ અને અન્ય કોઈની સંડોવણી છે કે કેમ તે સ્પષ્ટ થશે.
હાલમાં પકડાયેલા બંને આરોપીઓ શનિ ચૌહાણ અને સોનુ વર્માની પોલીસ દ્વારા સઘન પૂછપરછ કરવામાં આવી રહી છે. ઘટના સ્થળના સીસીટીવી ફૂટેજ અને સાક્ષીઓના નિવેદનોના આધારે પોલીસ મજબૂત પુરાવા એકત્રિત કરી રહી છે. શહેરમાં કાયદો અને વ્યવસ્થા જળવાઈ રહે તે માટે પોલીસ સતત પેટ્રોલીંગ કરી રહી છે. મિત્રો દ્વારા જ મિત્રની હત્યાની આ ઘટનાએ સમાજમાં માનવીય મૂલ્યો અને યુવા પેઢીમાં વધતી જતી હિંસા અંગે ગંભીર ચિંતા જગાવી છે.
