London,તા.4
યુકેમાં રહેતા એક ગુજરાતી યુવકનું ખૂબ જ કરૂણ સંજોગોમાં મોત થયુ છે. ઋષભ ઉપેન્દ્રભાઈ પટેલ નામનો આ યુવક મે 26ના રોજ ફેમિલી સાથે ન્યૂપોર્ટ પેગનેલમાં આવેલા બીચ પર પિકનિક માટે ગયો હતો જ્યાં બે લોકો પાણીમાં ડૂબવા લાગતા તેમને બચાવવા માટે ઋષભે પણ પાણીમાં ઝંપવાવ્યું હતું.
તેણે આ બંને લોકોને બચાવી પણ લીધા હતા પરંતુ તે વખતે અચાનક કાર્ડિયાક અરેસ્ટ આવતા ઋષભ ખુદ ઉંડા પાણીમાં ડૂબી ગયો હતો. તેને બચાવીને તાત્કાલિક એર એમ્બ્યુલન્સ દ્વારા મિલ્ટન કીનેસ યુનિવર્સિટી હોસ્પિટલમાં શિફ્ટ કરાયો હતો.
28 વર્ષના ઋષભને બચાવવા માટે ડોક્ટરોએ ખાસ્સા પ્રયાસ કર્યા હતા પરંતુ બે દિવસ બાદ તેનું મોત થઈ ગયું હતું. સ્વર્ગસ્થ ઋષભ પટેલ અમદાવાદ નજીકના પુંધ્રા ગામનો વતની હોવાનું જાણવા મળ્યું છે.
યુકેમાં તે પોતાની પત્ની મિની પટેલ અને દોઢ વર્ષની દીકરી વૃમી સાથે રહેતો હતો. પોતાનું ફ્યુચર બનાવવા માટે યુકે ગયેલા ઋષભે ત્યાં જ મે 28ના રોજ અંતિમ શ્વાસ લીધા હતા. મોત પહેલા બે લોકોને ડૂબતા બચાવનારા આ ગુજરાતીએ કાયમ માટે આંખો મિચી દીધા બાદ પણ ઓર્ગન ડોનેશન દ્વારા પાંચથી છ લોકોની જિંદગી બચાવી છે.
ઋષભના યુકેમાં કયા સ્ટેટસ પર રહેતો હતો તે નથી જાણી શકાયું, પરંતુ તેના અણધાર્યા મોત બાદ તેની પત્ની, દોઢ વર્ષની દીકરી અને અન્ય પરિવારજનોએ એકમાત્ર આશરો ગુમાવ્યો છે.તેની ફેમિલીને મદદ કરવા માટે ક્રાઉડફનિં્ડગ ચોક્કસ શરૂ કરાયું છે.
55 હજાર પાઉન્ડ એકત્ર કરવાના ટાર્ગેટ સાથે બે દિવસ પહેલા જ શરૂ કરાયેલા આ ક્રાઉડફન્ડિંગમાં અત્યારસુધીમાં 34,507 પાઉન્ડ એકત્ર થઈ ચૂક્યા છે, તેમાં ગુજરાતીઓની સાથે-સાથે યુકેમાં રહેતા નોન-ગુજરાતીઓ પણ ઉદાર હાથે ફાળો આપી રહ્યા છે.
આ તમામ રકમ ઋષભના પરિવારજનોને આપવામાં આવશે જેનાથી તેની દીકરીને ભણવામાં કોઈ તકલીફ ના પડે તે સુનિશ્ચિત કરવાની સાથે તેની પત્નીને પણ મદદ કરવામાં આવશે.
