ફરિયાદી અને વચ્ચે પડેલા મિત્રને લોખંડના પાઇપથી માથામાં ઇજા, બંનેને સારવાર માટે જી.જી. હોસ્પિટલ ખસેડાયા
(નયના દવે દ્વારા)
Jamnagar તા.૨૨
જામનગરના ભીમવાસ વિસ્તારમાં શેરીમાંથી મોટરસાઇકલ પુરપાટ ઝડપે ચલાવીને નીકળતા યુવાનને શેરીમાં વાહન ધીમું ચલાવવા કહેવા બાબતે થયેલી બોલાચાલી ઉગ્ર બનતાં ચાર શખ્સોએ એક યુવાન તથા તેને બચાવવા વચ્ચે પડેલા તેના મિત્રને ઢીકાપાટુનો માર મારી લોખંડના પાઇપથી હુમલો કરતાં બંનેને માથામાં ઇજા પહોંચી હતી. બનાવ અંગે પોલીસે ચાર શખ્સો સામે ગુનો નોંધ્યો છે.
ભીમવાસ શેરી નં.૧, જુના રેલવે સ્ટેશન પાસે રહેતા અવિનાશ દિપકભાઇ પગારે (ઉ.વ.૩૧)એ ફરિયાદમાં જણાવ્યું છે કે, તા.૨૦ ઓગસ્ટની રાત્રે સાડા દસ વાગ્યાના અરસામાં તેઓ પોતાના ઘર પાસે શેરીમાં ઉભા હતા ત્યારે પાડોશમાં રહેતા નવાઝ ચમડીયા અને ફેઝલ ચમડીયા મોટરસાઇકલ પુરપાટ ઝડપે લઇને શેરીમાંથી પસાર થતાં તેમને શેરીમાં વાહન ધીમું ચલાવવા કહેતાં નવાઝે ગાળાગાળી કરી ઝપાઝપી શરૂ કરી હતી.
દરમિયાન અવાજ સાંભળી ઈસ્માઇલ ચમડીયા, ગનીભાઇ ચમડીયા અને મોહીન ચમડીયા ત્યાં આવી પહોંચ્યા હતા. આ શખ્સોએ ભેગા મળી ફરિયાદી સાથે ઝપાઝપી કરી ઢીકાપાટુનો માર માર્યો હતો. આ દરમિયાન ઈસ્માઇલ તથા મોહીનના હાથમાં રહેલા લોખંડના પાઇપ ફરિયાદીના માથામાં વાગતાં ઇજા પહોંચી હતી.
ફરિયાદીનો મિત્ર કિશન રમેશભાઇ ભારદ્વાજ વચ્ચે પડી બચાવવા જતાં તેને પણ લોખંડના પાઇપનો ઘા માથામાં વાગ્યો હતો. બનાવમાં ફરિયાદી તથા કિશન બંનેને માથામાંથી લોહી નીકળતાં પાડોશીઓએ ૧૦૮ એમ્બ્યુલન્સને જાણ કરી હતી. બંનેને સારવાર માટે જામનગરની જી.જી. હોસ્પિટલમાં ખસેડવામાં આવ્યા હતા. ફરિયાદીને માથાના આગળના ભાગે ત્રણ તથા પાછળના ભાગે ચાર સ્ટેપલર ટાંકા આવ્યા હતા, જ્યારે કિશનને માથામાં સાત ટાંકા આવ્યા હોવાનું ફરિયાદમાં જણાવાયું છે.
આ ચારેય શખ્સો ત્યાંથી જતા રહ્યા ત્યારે ગનીભાઇ ચમડીયાએ ફરિયાદીને ફરી ઝઘડો કરીશ તો જાનથી મારી નાખવાની ધમકી આપી હોવાનું પણ ફરિયાદમાં જણાવાયું છે. બનાવ અંગે પોલીસે ભારતીય ન્યાય સંહિતાની કલમ ૧૧૮(૧), ૧૧૫(૨), ૩૫૨, ૩૫૧(૩), ૫૪ તથા ગુજરાત પોલીસ અધિનિયમની કલમ ૧૩૫(૧) હેઠળ ગુનો નોંધી વધુ તપાસ હાથ ધરી છે.
